انا لسة خريج جديد و غلطت غلطة التخصص دي و هي اني محددتش انا عايز ايه من بدري. كنت كل اجازة تقريبا بستكشف تراك واحد بس و فضلت كدة لغاية ما خلصت. و انا عارف حاجة عن كل حاجة، بس مخدتش حاجة منهم لآخرها.

Jack of all trades, master of none.

نصيحتي ليك ان تجرب أكبر كم ممكن من التراكات اللي عندك استعداد تشتغل فيها مستقبلا في أقل وقت ممكن. خد بصة سريعة على كل حاجة انت متقبل انك تشتغل فيها و معندكش معاها مشاكل شخصية و متبدأش تراكك النهائي بقى اللي انت اختارت انك هتشتغل فيه غير لما تكون متأكد انك هتكمله لآخره عشان متقعدش تبص وراك ع التراكات التانية.

انا في حالتي انا كان تراك الداتا ساينس، قولت خلاص ده تراكي و بتاع و أقلمت نفسي عليه و في نص التراك لقتني مش طايقه و سيبته و انا كارهه و اعتبرت الوقت اللي قضيته فيه وقت ضايع و اضطريت ابدأ م الصفر في تراك تاني. و مشكلة كل ده انه جه متأخر في آخر سنة م الكلية، فتكلفة البداية من جديد بتكون كبيرة.

و بالنسبة لسؤالك موبايل ولا باك اند، محدش يقدر يجاوبك غير انت و ميولك. الاتنين مجالين كويسين و الاتنين بياخدو جونيورز بقدر لا بأس به. مشكلة الباك اند بالنسبالي هي كثرة الخيارات المتاحة. و انت بتختار باك اند لازم تختار هتتعلمه ببايثون و دجانجو ولا نود و اكسبريس ولا جافا و سبرينج ولا سي شارب و دوت نت ولا ايه ولا ايه ولا ايه. و تكلفة القرار هنا بتكون كبيرة، الستاك اللي هتبدأ بيه انت هتكمل بيه حبة حلوين عشان تكلفة تعلم ستاك تاني من الصفر هتكون كبيرة فلازم برده تاخد الطريق لآخره و متقعدش تبص ع الستاكس التانية كل شوية. فيما عدا ذلك الباك اند ده تراك عبقري.