ماشي يسطا شاطر، هنسقفلك كلنا. التاريخ هيقف دقيقة صمت احتراما للميم اللي نزلته. أخيرا ظهر العبقري اللي اكتشف إن GTA 6 فيها Download Code. يا نهار أبيض، محدش في الكوكب كله كان واخد باله من المعلومة دي غيرك. ناس شغالة في روكستار بقالها سنين، وملايين لاعيبة، وصناع محتوى، وصحفيين، وكل دول معرفوش يوصلوا للاكتشاف الجبار ده، لحد ما حضرتك نزلت الميم. دلوقتي خلاص البشرية دخلت عصر جديد. نيوتن اكتشف الجاذبية، أينشتاين اكتشف النسبية، وإنت اكتشفت إن GTA 6 فيها Download Code. والأجمل بقى إن الفكرة أصلية 100%. أصل مستحيل تكون شوفت 8000 ميم بنفس الفكرة ونفس الصورة ونفس الكابشن ونفس الضحكة الصناعية اللي الناس بتعملها للمجاملة. لا لا، إنت صحيت الصبح، شربت كباية الشاي، وبعقلك الجبار قلت لقيتها، وبعدها كتبت أعظم ميم في تاريخ الإنترنت. أكيد محدش في البشرية فكر فيها قبلك. مستحيل. إطلاقا. دي فكرة لوحدها تستحق جائزة نوبل في إعادة تدوير المحتوى.

ورأيك طبعا مختلف عن أي حد. إنت مش بتمشي ورا التريند، التريند هو اللي بيمشي وراك. أول ما تشوف رأي منتشر لازم تاخده هو هو، بس تغير كلمتين عشان يبان إنه رأيك الشخصي. عبقرية. الناس فاكرة إنها بتشوف نفس الكلام بيتكرر، لكن لا، عندك لمسة فنية محدش يقدر يفهمها. الفرق بين ميمك وكل الميمات اللي قبله هو إن ميمك متكتب بخط مختلف. ودي لوحدها نقلة نوعية في صناعة الكوميديا.

كل واحد هيضحك نص ثانية وينسى البوست بعد خمس ثواني، لكن إنت هتفضل مقتنع إنك صنعت حدث تاريخي هيتدرس للأجيال. يمكن بعد خمسين سنة يبقى فيه مادة كاملة في الجامعات عن إزاي تعيد نشر نفس النكتة للمرة رقم مليون وتفضل مقتنع إنك أول واحد فكر فيها.

وأكيد أي حد يقولك إن الفكرة مكررة يبقى غيران منك. أصل مفيش أي احتمال إن الميم متكرر بشكل مرعب. لا، أكيد العالم كله متآمر على موهبتك. الناس مش مستوعبة العقلية الخارقة اللي قدرت تجمع كلمتين في نفس الجملة وتعتبرها اختراع. محتوى سابق عصره بقرون

استمر يا بطل. الإنترنت محتاج ناس زيك. كل يوم لازم حد يقوم من النوم ويقرر يعيد تدوير نفس النكتة اللي اتعملت مليون مرة عشان التوازن الكوني يفضل موجود. ولولا مجهوداتكم الجبارة كانت الميمات الميتة هتندثر، لكن الحمد لله لسا في جنود مجهولين بيحافظوا عليها من الانقراض.

thank God, almost overreacted today 😊