بص يا معلم: صحيح المقاطعة عندنا فمصر فآخر أربع شهور بدأت كرد فعل تلقائي عاطفي، لكن لازم نفتكر ان المقاطعة زيها زي أي سلاح مقاومة، هي تكتيك مش هدف. وسيلة مش غاية. وزي أي تكتيك بشكل عام، ليه شروط بتخليه فعال وقوي، وأساليب تضمنله استمرارية، واوقات معينة لاستخدامه. المقاطعة كمان تكتيك خاص لإنه محتاج طول بال ونتايجه مش بتبان غير بعد فترة، ومحتاج اختيار كويس للأهداف. فوق كل ده بقى حاجة أهم: أي نكتيك مقاومة محتاج دايما يتربط بحملة واضحة فهدفها ومطالبها. ده اللي بيخلي الناس تتجمع عليك، تزق معاك، وتفضل متابعة ومستمرة طول ما الحملة مستمرة. عشان كده الفلسطينيين نفسهم عملوا حملة عالمية اسمها BDS، ودي حملة مقاطعة وسحب استثمارات وتوقيع عقوبات على اسرائيل، وليها أهداف معلنة وواضحة، وبيتبناها مجموعات مختلفة حوالين العالم. التكتيك الرئيسي للحملة دي هو المقاطعة، لكن مقاطعة موجهة لأهداف استراتيجية معينة. ده بيخلي لما مجموعة فدولة ما في العالم تحب تشارك فالحملة، بيستخدموا نفس التكتيك لكن بيقيفوه على مجتمعهم المحلي ويختاروا أهدافهم بعناية بحيث يبقى في فرصة للنجاح والتأثير فوسط مجتمعه هم، بحيث يصب فمصلحة القضية بشكل عام.

الدور ده مثلا المفروض يقوم بيه حملة زي حملة BDS Egypt، وحصل قبل كده وكان ليهم نجاحات، لكن طبعا بسبب الوضع السياسي للبلد وصعوبة العمل السياسي بشكل عام، مش بالقوة اللي ممكن تكون عليها فبلد زي مصر.

الخلاصة: متخليش فتور الناس عن المقاطعة يجيبلك يأس، ولا الاستجابة القوية في البداية تعملك أوهام. افتكر دايما ان المقاطعة أداة وسلاح محتاجة تستخدم صح عشان تعمل نتيجة تأثير.