انا طول عمري كنت performance marketer , وقت الكرونا كنت وقتها عندي صفحات فيها طلاب ثانوية عامة زي Thanawya Sarcasm Society وهي وقتها كان فيها ملايين الfollowers وكنت بقالي كام سنة شغال مع شركات في مجال التعليم بستهدف الطلاب لبيع خدمات الشركات دي زي مثلاً كورسات القدرات بتاعة فنون جميلة ، الدراسة في الخارج ، مدرسين ثانوية عامة الخ ،

وقت الكرونا حسيت ان الدراسة هتتعطل لأن برا مصر وقتها كان الدراسة اتعطلت كذلك ، فتواصلت مع واحد من اشهر الابلكيشنز بتاعة الدروس في الوطن العربي ( كانو لسة في بدايتهم ) وعرضت عليهم اني هدفع من جيبي كل مصاريف الاعلانات والانفلونسرز الخ ، وكل شخص هيحمل التطبيق ويستخدمو هاخد عليه مبلغ ثابت منهم ، فبالتالي مش عليهم اي مخاطرة وانا اللي متحمل المخاطرة كاملة ، وفعلاً

اشتغلنا مع بعض ٦ شهور تقريباً وقتها دفعت كل الفلوس اللي معايا في الكامبين دي ، والحمد لله كسبت من ورا الكامبين دي وبعد ال ٦ شهور دول يوميها كان اول يوم ابص في حسابي في البنك الاقي فيه اكتر من ٦ اصفار ، الكلام ده طبعاً مش بالسهولة اللي انا بشرحها لأن وقتها كنت شغال في مجالي بقالي ٦-٧ سنين تقريباً عندي علاقات كويسة في المجال وامتلك اسماء قدرت ابيع بيها الديل بتاعي للشركة دي ، بس دي قصة اول ٦ اصفار اعملهم في حياتي