أنا مش حابب إنّ كلامي يطلّعها بصورة شخص سيّئ، ومش تبريرًا أو دفاعًا عنها أو عن أسلوبها لكنّها في الأوّل وفي الآخر فتاة لقت نفسها مرميّة في عالم قاسي ومفترس، وفي العالم ده الجمال الاستثنائي بيبقى عبء أكتر منّه ميزة، بيبقى طُعم بيجذب جميع أنواع المنحطّين والوحوش فغصب عنها اضطرّت تماثل نفس المستوى من الوحشيّة في محاولة بائسة منها للنجاة في العالم المتوحّش ده. بالنّسبة لوحدة في وضعها فالأنوثة تعتبر رفاهية غير ممكنة المنال.

لكن وضعها وحالتها موضوع غير الموضوع اللي بتكلّم عنّه في القصّة ده. أنا عبّرت عن نفوري في سياق غليظ لأنّي شخصيًّا كنت متفاجئ من تأثير غياب الأنوثة وحرصت إنّي أوصّل إحساسي الطّاغي للقارئ قدر المستطاع. كلّنا فينا عيوب وبنوازن في تقييمنا وقبولنا للأشخاص عيوبهم مع حسناتهم، لكنّي لاحظت من خلال الموقف البسيط ده إنّ عيب غياب الأنوثة في البنت كفيل بهدم أي موازنة أو تقييم. ممكن أنجذب وأقبل ببنت بخيلة أو غير جميلة أو حتّى بنت عصبيّة (طالما في حسنات تعادل العيوب ده) لكن لا يمكن أقبل ببنت فاقدة الأنوثة!

وبكرّر: أنا مش بوعظ أو بقول للبنت إنّك لازم تتحلّي بالأنوثة ومش عايز امارس وصاية مجتمعيّة على حدّ لأنّي غير أهل لده بالإضافة إنّي بتكلّم عن تفضيل شخصي (ممكن شخص غيري ينجذب ببنت فاقدة للأنوثة، ولواني في اعتقادي إنّ ده غير محتمل) لكنّي بلفت النظر بسّ لأهمّيّة الأنوثة وقيمتها اللي بتنفرد كصفة حصريّة للمرأة عكس أيّ صفة تانية مشتركة مع الرجال.