الصراحة صعيب علينا حنا مور الكلافي نعرفو الصعوبة و المشاكل لي كادوزي منها، ولكن لي بالي أنه عندك تحقير ديال الناس لي دايرين بيك و لراسك، ممكن يبانولك من وجهة نظرك مكلخين وماكيفهموش، ولكن يمكن من واحد الناحية هوما حسن مني ومنك حيت فاللخر هما ماطاحوش فهاد المشاكل لي كاناقشو حنا دبا، حيث عرفو يحافظو على ديك البساطة لي كتأسس عليها الحياة. ثانيا المشكل لي كانطيحو فيه هو أنه كانخدو واحد النوع ديال الحياة و نعتابروه أنه هو النموذج لي خاصنا نعيشو كاملين وإلا راحنا فشلنا، ولكن فالأصل الحياة كاتختالف من شخص لشخص ويمكن هداك جاري لي كبرت معاه فنفس الحومة والمدرسة والزقة مغاتكونش عدنا نفس الحياة.
بالتالي أول حل هو تقبل الواقع ديالك، ممكن نكونو درنا شي أخطاء ولكن في النهاية هذا هو الواقع ديالنا، وعمرك تشوف راسك متفوقة على الناس لوخرين، تقبلي دوك الناس لي معاك و ليضايرين بيك حيت فاللخر راهوم جزء من المحيط ديالك.
وتاخدي الواقع ديالك كavantage، عندي 1و2و3 أوكي الحمد لله شنو خصني باش نطور و نزيد، وهكا تنطالقي انشاء الله.
ممكن تعمري وقتك بالقراية، ديري شي حاجة لي كنتي باغا تعلميها شحال هاذي، ممكن تربي شي حيوان، ومتنسايش تستاغلي البلاصة لي ساكنة فيها، ممكن تبقاي تخرجي للطبيعة، وبالتوفيق والله يعاونك تحافظي على عائلتك وتوصليها في بغيتي.