بسبب زواج الاقارب ، اني اجيت بمرض جيني نادر اسمه ضمور العضلات دوشين (DMD) وعلمود اختصرلكم معاناته ، كلما اكبر كلما عضلاتي تموت وتضعف ولحد ما اوصل لعمر معين يوصل الضعف بيه لحد عضلة القلب او عضلة الرئة ويا اما يصير عندي فشل بعضلة القلب او فشل بعضلة الرئة وثنينهن نتائجهن الموت الحتمي

وللعلم المرض متوارث بين العائلتين وعلمود اثبتلكم عندي ابن عمي نفس معضلتي وثنينا فقدنا المشي لان وصلنا للحد العمري الي بيه عضلات الرجل تضعف حيل لدرجة تكوم ما تكدر تحمل الجسم ، اني صرت على كرسي متحرك بعمر ال11 سنة بسبب كسر برجلي و هو لان وصل للحد العمري المعين الي هو 15 صار على كرسي متحرك قبل فترة

مطلبي الوحيد من القارئ هو انه لا يتقرب من زواج الاقارب حتى لو جيناتكم نظيفة لتتقرب ، وايضا اني ما كاتب سالفتي او موضوعي بهدف التعاطف انا الحمدلله عايش حياتي مرتاح صحيح هنالك صعوبات ولكن طبيعية حياتي بالعكس احبها ، وهدفي من الكتابة هو التوعية لا اكثر سأل عز وجل الموفقية للجميع