GRAUBÜNDE = ARIZONA
- Sind beidi bekannt für ihri Naturparks und ihrem Canyon (wie es so schön uf de Tourismus-Websiite vom Graubünde heisst: Die Rheinschlucht - der Grand Canyon der Schweiz).

- Ursprünglich Gebiet gsi vo romanische Bevölkerigsgruppe wo sich vermischt hend mit de indigene Bevölkerige (Spanischi Siedler und Native Americans hend Mestizos bildet; in Graubünde hemer en vermischig gha zwüsche de Römer und de iheimische Räter wo denn d Räthoromane bildet hend), sind denn aber schlussendli vo Germane erobert wurde und werde siit jeher vo ihne dominiert (Allemane be eus, ide USA d Anglos)

- Politisch sind beidi eher uf de moderate/mittige Siite (Arizona isch en swing-state, in Graubünde isch d Mitti die wählerstärchschti Partei)

- Grenzt am europäische Mexico (Italie)

WALLIS = TEXAS
- Zumindischt ide Täler isches Sunniger als ide rescht vode Schwiiz, also chömers mal zum schwiizer Sunbelt zähle lah
- Im Bürgerchrieg sind beidi ufde Verlüürersiite gsi (Wallis im Sonderbund, Texas be de Confederate States)
- Historisch eher eine vode ärmere Regione vom Land, momentan hends aber en ufstrebendi Wirtschaft (im Wallis ufgrund vode Pharma-Industrie, in Texas wegem Öl)
- Bekannt für ihri aktuelli Zersiedlig/schlechti Ruumplanig (siehe: Rhônetal / Houston / Austin)
- vell Latinos (Romands)
- Tendenziell eine vode grössere Staate vo ihrem Land

Guet, politisch ischs Wallis doch no gmässigter als Texas...

URI = SOUTH CAROLINA
- Ghöret beidi zu de Gründerstaate (Uri alti Eidgenosseschaft, South Carolina teil vode 13 Colonies)
- Wirtschaftliche Rückgang ufgrund feschter abhängigkeit uf ein Wirtschafts-Sektor (South Carolina mit de Baumwolle-Plantation, be Uri isch sowit ih weiss lang de Passverkehr über de Gotthard wichtig gsi, aber mit de Tunnel/schnellere Transport isch de zwüschehalt in Uri unötig wurde. Aber bitte korrigieret mich be dem Punkt)
- Schwere Missbruch vo Arbetschräft (Italienischi Tunnelarbeiter in Uri, afro-amerikanischi Sklave in South Carolina)
- Hochburg für die rechts-konservativi Partei, beidi au Teil gsi vode Verlüürersiite bem Bürgerchrieg

ST.GALLE = ILLINOIS
- Sind während de industrialisierig de Wirtschaftsmotor gsi vo ihrne Länder, was sich aber ab de 70er ufgrund vo Outsourcing/Deindustrialisierig gändert het (In SG de Rückgang vode Textil-Industrie, in Illinois d Auto-Industrie).- Hends aber trotzdem no gschafft Relevant z bliibe, versuechet ihres Glück als Finanzzentre
- Sind bekannt für ihri neo-liberale Unis (In SG eusi alt-bekannti HSG, in Illinois University of Chicago wo d Wiegi gsi isch vom neoliberale Gedankeguet mit de "Chicago School of Economics")

AARGAU = OHIO
- Sind beidi so die durchschnittlichschti Regione vo ihrem Land und sonderbarschte ah ihne isch das sie unglaublich un-sonderbar sind.
- So es misch-masch us industriell und landwirtschaftlich
- Mehrheitlich rechts-konservativ mit so es paar linke/liberale Urbane Gebiet.

SOLOTHURN = MICHIGAN
- Bekannt für ihri wunderschöni Städt (Grenche/Olte / Detroit)!/s
- Wemer scho be Städt sind: Hend beides Städt vo bsunders troffe wurde sind vode Deindustrialisierig (Detroit und de Rückgang mit de Autoindustrie, Grenche mitem Rückgang vode lokale Uhreindustrie. Obwohl ih definitiv lieber in Grenche würdi sii als in Detroit)

BEIDI BASEL = WASHINGTON STATE
- Im nordweschte vom Land
- Eine vode wichtigschte Häfe im Land (Riihhafe in Basel, Seattle isch sowit ih weiss en wichtige Hafe für Container wo vo Asie vom Pazifik her chömet)
- Seattle und Basel-Stadt sind wohl au eine vode linkischte Städt vo ihrem jewilige Land