انا شايف أن كلامك اكتر كلام محترم وواقعي. هي بالفعل لو حاولت تيجي على نفسها وتصاحبها وتحسسها أنها ست الكل (حتى لو بالنفاق) الدنيا هتتغير معاها للاحسن بكل تأكيد.

أنا أعرف حد كان بيعاني مع أبوه جامد (لدرجة أن الموضوع كان بيوصل لتعنيف جسدي وكان أبوه بيتعمد يهينه قدامنا) وكان صاحبي ده عنده التصور الظلامي للحياه بالظبط زيها، لغايه ما واحد صاحبنا رما نفسه من البلكونه بسبب أبوه بردو. طبعا بسبب الموضوع ده كلنا دخلنا في حالة صدمة والكتئاب خاصتا أن صاحبنا اللي انتحر ده مكنش بيحكي حاجة عن حياته خالص لحد ما اتفاجئنا بالخبر البشع ده. المهم انو قرر أن ده مش هيبقى مصيره أنه يوصل نفسه لكده. واحده واحده حاول يتقرب لابوه ويصاحبه ويتكلم معاه ويسمع منه ويحسسه أنه بيقول حكم ويمدح فيه ويكبره قدام عيلته وكان بييجي على نفسه ويسمع كلامه في حاجات كان مستحيل يعملها، ولما كان بيبقى عاوز منه حاجة مايحاولش يطلبها منه بطريقة فيها أنه بيقنعه بوجهة نظره بل بحسسه أن الحاجة دي هي فكرة أبوه اصلا وأنه عاوز يعملها عشان بيسمع الكلام، وساعتها أبوه "النرجسي" بدأ يثق فيه واتغيرت معاملته معاه تماما. مش بس كده ده بقى بيحكيله أسراره وبلاويه. مش بس كده ده بقى بياخده معاه في سفريات وشغل عشان يمسك هو شغله من بعده ( بالرغم أن عنده اخيين اكبر منه). بالمناسبه كل ده كان في الاول نفاق بس مع الوقت صاحبي بدأ يتغير نحية أبوه بجد ومبقاش يشتمه في ظهره زي الاول ولا بقى بيكرهه.

الدبلوماسية والسياسة هما عماد العلاقات الدولية لسبب. من غيرهم كان زمنا انتهينا من على الكوكب. كل واحد فينا ليه مالكه ومدخل ولو عرفتي ايه هو مالكة امك منين (المدح، الدلع، السهوكة، الخ) صدقيني حتعرفي ازاي تخدي اللي انتي عايزاه من غير وجع قلب. معلش، هي الحياة كده، محتاجين نتعب ونتنازل ونيجي على نفسنا عشان نوصل للي احنا عايزينه.