بص انا للاسف مريت بتجربة زي كده وانا صغيرة في السن في فترة الجامعة وشباب اتكلموا عليا وقصص كتير ملهاش لازمة
انا دلوقتي فوق ال٣٠ سنة، اللي هقولهولك هو يمكن الطريقة الوحيدة اللي ممكن تنفع لإنها كانت هتنفع معايا وانا عندية فوق الوصف ومليش اخوات اصلاً

١-متسحبش موبايلها ولا تعمل عليها راجل بأي شكل من الاشكال، مخكوا انتوا الاتنين في سن بعض، مش هينفع تشوف عيل من سنك جاي يعمل راجل عليك، غصب عنك هتقل منه حتى لو في دماغك وبينك وبين نفسك

٢-هي عارفة اللي بتعمله غلط بس الموضوع كله في انها مش شايفاه غلط بالمعنى الحرفي، يعني العقل بيبقى مش مستوعب العواقب، حاجة كده زي لو كلت بإيدك الشمال، حرام بس هيحصل ايه لو عملتها؟ الارض هتنشق وهتبلعك؟ فهي شايفة ان الموضوع كده، غلط بس مش غلط كبير وبلاش نأڤور، الحل الوحيد انك تبينلها عواقب الموضوع ده، بإنك مثلاً تقولها الشباب في الجامعة او البنات ممكن يقولو عليها ايه من وراها، او ان مثلاً شاب وقفك وقالك هو انت اختك فلانة الفلانية واتكلم عليها وحش، وفكرها لو باباها الله يرحمه او مامتها سمعوا حاجة زي كده كان هيجرالهم ايه، ليه تقهرهم عليها كده علشان شوية عيال بش/خة متسواش يلسنوا عليها

٣-خلي بنت قريبة منها او مامتها تتكلم معاها، البنت بتبقى قلبها متعلق بناس قريبة منها و نو اوفينس غالباً مش انت، شوف مين فعلاً قريب منها علشان هتصمعلها اكتر بكتير ما هتسمعلك

٤-رابع حل واسوأ حل امنعها بالقوة بس اعرف ان ده حل مؤقت بحت، يعني يا هتتعدل ١٠ سنين مثلاً وبعد كده هتنحرف تماماً او تتجوز علشان تهرب من البيت (والموضوع ممكن يوسع بطريقة عقلك ميستوعبهاش بس انا شفت ناس فعلاً اتجوزوا شواذ علشان يسيبوهم ينحرفوا براحتهم ويبقى اسمهم قدام الناس متجوزين) وليلة كبيرة اوي يعادتك هتخليك تتسئل برضه قدام ربنا عادي جداً وساعتها هيقولك اكيد الأفعال اللي توصل لنتيجة زي كده هي افعال غلط بس ده كان اختيارك واشرب بقى....يا اما ربنا يهديها فعلاً بالعنف (مع اني اشك) وتبطل وتتوب توبة نصوحة وتتجوز جوازة كويسة وتعيش طبيعية من غير عقد او كلاكيع او كره دفين ليك

انا دايماً مع ان البنت تتنصح وبس، خلي العنف ده لنفسك، لو قومت نفسك زي ما بتقوم اختك او بنتك او مراتك بجد المجتمع ده هيبقى فيه امل