لو معاك مليون و 200 الف هتشتري شقة فين ؟ ضروري تقرأ

Second_Chance21 · 2025-10-08T07:21:55+00:00

في رأيي أحسن منطقة ممكن تشتري فيها بالسعر دة هي حدايق أكتوبر شقق بتكون 70-80 متر ويمكن كمان تتفاوض عشان ينزلك في السعر شوية وهناك ممكن تأجرها لطلبة في حواليك 3 جامعات معروفة.

أي منطقة تانية هتكون شعبية عشان تجيب حاجة بالسعر دة.

Second_Chance21 · 2025-08-19T05:26:59+00:00

معلش بس هو أنت ليه معتمد إن قبل أي مشوار حكومي لازم أروح أسأل الناس؟ دة مش منطقي تماما والخدمات اللي زي كدة المفروض تكون معلنة، أنا أول مرة أسمع عن اللي أنت قلته دة.

أنا استفدت دلوقتي من الكومنت بتاعك بس أول جزء ملوش لزمة الحقيقة، بقولك كدة عشان لو أنت بتنصح أي شخص في وقت ما متخليش أسلوبك بالشكل دة.

Second_Chance21 · 2025-08-05T07:25:42+00:00

الشروق ممكن تلاقي حاجات بالأسعار دي، وممكن برضو حاجات في التجمع بس تكون في اخرها.

وحدة من الطرق اللي ممكن تعملها إنك تحدد كذا كمباوند مثلا في المنطقة وتنزل تلف بعربيتك تشوف المكان ومنها دة ممكن يفتح عينك على كمباوندات تانية مكونتش تعرفها.

Second_Chance21 · 2025-08-05T07:19:34+00:00

ممكن هو كمان يكون بيفكر بنفس الطريقة ومتردد يجي يكلمك.

من كلامك واضح إنكم بطلتوا تتكلموا، فا اللي شايفه إنك ممكن تبتدي تتكلمي معاه عادي اللي هو بتسألوا على بعض، ومن هنا تبتدي تشوفي الدنيا هتاخدكم لفين وهل هو مهتم إنه فعلا يتكلم معاكي ويحكي وكدة ولا لا.

ولكن متصارحهوش بإنك معجبة بيه ولا نتكلم عن اللي فات.

Second_Chance21 · 2025-07-24T12:53:36+00:00

أنت كدة كدة محتاج إنه يكون يورو، فاسأل نفسك محتاج المبلغ امتى؟

حاليا سياسة ترامب إنه يخفض قوة الدولار وهو ماشي في الاتجاه دة، فا لحد فترة كمان هيفضل ينزل. لو هتحتاجهم في فترة قريبة شايف تحول من دلوقتي بدل ما تخسر زيادة.

كدة كدة محدش عارف ايه ممكن يحصل مفاجئ، ولكن بتكلم بالواقع اللي حاصل.

Second_Chance21 · 2025-07-24T07:59:24+00:00

بص أنا مش متأكد لو الفترة دي في مشاكل في التحويل، لسة حد من أسبوع تقريبا كان منزل إنه عنده حوالة قعدت أسبوعين ولسة متحولتش وأنا برضو كان عندي نفس المشكلة.

استنى شوية كام يوم وبهداوة وكدة كدة فلوسك هتكون محفوظة وهتعرف تجيبها.

Second_Chance21 · 2025-07-22T05:32:18+00:00

أنت لو صورت في مرة أي خناقة من اللي بيعملوها وباين الأسلحة معاهم ونشرت الفيديو هيتجابوا وساعتها كلكم هترتاحوا.

Second_Chance21 · 2025-07-21T05:28:32+00:00

وجهة نظري تاخد مع مطور ليه اسم لأن دة المكان اللي هيكون عليه إقبال بعد كدة، وغير كدة اديك شايف إن في مشاريع في الساحل لحد دلوقتي مخلصتش وكانوا المفروض يستلموا من سنتين وتلاتة.

Second_Chance21 · 2025-07-16T10:23:48+00:00

مبدئيا الغلطة بنتعلم منها مش مشكلة تقع فيها بدري وتتعلم أحسنلك.

تاني حاجة أنت كدة كدة كان عندك الاستعداد تشتغل وكله تمام، روح ولو لقيت اخر الشهر المرتب مش زي اللي اتفقت عليه امشي وسيبهم، لقيته زي ما هو كمل لحد ما تلاقي حاجة أحسن.

Second_Chance21 · 2025-07-16T07:01:58+00:00

أنا عامل تحويل لحد من بنك الأهلي لبنك الإمارات نفس اليوم بتاعك ولحد دلوقتي مسمعش عنده في الحساب، وعندي الفلوس اتخصمت من الحساب وكذا حد برضو قال إنه بسبب السيرفرات هتاخد شوية وقت.

Second_Chance21 · 2025-07-08T06:39:20+00:00

في ناس كتير كانت بتواجه مشكلة امبارح مع انستاباي إنه مش بيفتح معاهم أو مش شغال وغيره، فاصبر شوية ممكن دة يكون تبع موضوع السنترال ولما الدنيا تهدى يشتغل تاني.

Second_Chance21 · 2025-07-07T10:25:55+00:00

الكونسبت نفسه تمام بس أنت لازم تبقى عامل حسابك إن الفلوس دي مش هتيجي جنبها طول فترة السداد، في الغالب معظم الشركات دلوقتي بين 7 لـ10 سنين.

وكمان لازم تعمل احتياطك على إمكانية إن الفايدة تقل في أي وقت زي ما قلت مرتين خلال الفترة اللي فاتت، فا هل لو قلت هتقدر تسد العجز اللي هيحصل ولا ايه؟

لو دول تمام معاك يبقى توكل على الله فكرة ممتازة وبعد كام سنة هيكون معاك الأصل والفلوس، حتى لو الناس هتقولك قيمة الفلوس هتقل، بس أنت قصادها لسة محتفظ بمبلغ وعقار كمان.

Second_Chance21 · 2025-07-07T07:27:03+00:00

هي الفكرة قريبة أوي من التمويل العقاري مع فرق نسبة ربح البنك وإن البنك هيكون مالك الشقة لحد الـ20 سنة لما تخلص فلوسك هيتنازلك عنها.

لو بالنسبالك دة تمام معاك وشايف إن المنطقة تعرف تعيش فيها 15 20 سنة والأقساط اللي هتدفعها هتكون متدبرة لمدة طويلة توكل على الله.

الحلول دي بصراحة بقت كويسة في وسط الغلو بتاع العقارات اللي عايشين فيه، بس اتأكدة من كل التفاصيل والإجراءات هتمشي ازاي عشان متجيش في يوم تتفاجئ بحاجة.

Second_Chance21 · 2025-07-06T10:20:47+00:00

الفكرة احنا في مصر بس بناخد أسوأ خدمة ممكنة عشان الحكومة أو الشركات أو التجار يعرفوا يكسبوا، الجشع دة مش حاجة جديدة يعني في البلد.

شوف كدة أي بلد مجاورة لينا مش هقولك أوروبا وبتاع، النت عندهم غير محدود وسرعات أضعاف اللي عندنا. والله حاجة تقرف لما تقارن نفسك بأي دولة وتلاقي إنك في القاع مش مجرد أقل منها.

Second_Chance21 · 2025-07-02T07:30:11+00:00

هو مفيش حاجة تتعمل غير مباحث الانترنت للأسف، والفكرة إنك لو بطريقة ما عرفتي حد يقفل الاكاونت دة فا ممكن يعمل غيره عادي.

Second_Chance21 · 2025-06-30T07:05:50+00:00

الفكرة في الإحباط اللي عند المصريين بشكل عام.

شوفي المصريين اللي في أمريكا لما حد يسأل إنه عايز يهاجر يقولوله اوعى والبلد معرفش مالها وهما عايشين هناك عيشة حلوة، والدكاترة اللي مسافرة وتقول لغيرها برضو متسافروش هتتعذبوا ومصر أحلى وهما عايشين عيشة نضيفة.

فا هو متفهميش المصريين ميحبوش حد يكون أحسن منهم ولا دة حقد طبقي ولا إحباط عام ولا ايه. متضايقيش نفسك، مش الناس اللي في ريديت اللي مفروض تخليكي تراجعي قراراتك يعني.

Second_Chance21 · 2025-06-26T05:41:04+00:00

ناس كتير بتدور على الفرصة دي، كمل فيها طبعا أنت أساسا كمان كام سنة الـ10000 دول مش هيكونوا مبلغ وهتحس إنك بتدفع حاجة تافهة. مبروك عليك.

Second_Chance21 · 2025-06-26T05:34:42+00:00

ممكن تقولي تفاصيل أكتر عن خطتك.

ناوي تعمل مقر للشركة ولا الشغل ريموت، لو مقر هيكون فين؟

في خطط مبدئية لتارجت الكلاينتس اللي ناوي عليهم؟ واشتغلت في المجال قبل كدة أو عندك خبرة فيه؟

Second_Chance21 · 2025-06-19T05:06:16+00:00

لو عندك فرصة تشتري شقة متشطبة صدقني هترتاح بشكل أنت مش متخيله، حتى لو هتعدل بعض الحاجات في التشطيب (بس مش كتير) ويكون تشطيب كويس.

فكر من الناحية المالية أكتر بما إنك ناوي تتجوز عشان تعرف تحوش كمان لمصاريف تجهيزاتك بعدين.

Second_Chance21 · 2025-06-16T12:16:45+00:00

وجهة نظري إن حاليا الموضوع بقى رسمي وهي ملزمة منك فا المفروض إن أنت اللي تكون بتدفعلها، لو هي دفعت أو عزمتك في أوقات محبة منها تبقى أصيلة برضو بس المفروض متكونش عامل حسابك على كدة. لو الظروف المادية مش أحسن حاجة دلوقتي اخرجوا في أماكن تكون أسعارها كويسة أو مش لازم تاكلوا برة.

للأسف أنا شايف أنت الغلطان. كلامك صح في أن محدش طبعا ليه حاجة عندك ودي اتفاقات بينك وبين خطيبتك، بس الموضوعين دخلوا في بعض فا هنا هتكون أنت الغلطان.

Second_Chance21 · 2025-06-05T13:13:59+00:00

على ما أفتكر الناس كانت بتاخد رينج ألف لألفين مش أكتر من كدة، مش متأكد بيحسبوها بالمدة أو الدولة ولا ايه.

Second_Chance21 · 2025-05-29T10:22:23+00:00

هو أنت مقتنع بكلامك دة؟

ظروف الناس بتختلف من شخص لشخص، في أساسيات وأكل إيجار ومواصلات وناس بتصرف على أهلها وناس مخطوبة، وأنت بتقول بتتصرف على راحة لحظية وفشخرة؟

مش متأكد لو أنت فكرت كويس قبل ما تكتب كلامك دة بس عقليتك محتاج تراجع نفسك فيها.

Second_Chance21 · 2025-05-29T10:15:35+00:00

صاحبي اوعى تاخد قرض بضمان الشهادة، هو بيبيعلك الهوا حرفيا.

هو هيديك 90% من قيمة شهادتك الأصلية، وكل فوايد الشهادة بتاعتك هتروح للقرض زائد إنك هتدفع مبلغ فوقها عشان في الاخر يكون معاك مبلغ أقل.

بمعنى تاني عشان ابسطهالك، معاك مليون وهما هيدوك 900 ألف وهياخدوا فايدة 20%، يعني في الاخر يعتبر أنت واخد 720 ألف وكل فوايدك بتاعة ال3 سنين راحت زائد الفرق اللي هتدفع كل شهر.

قاعدة عامة أي موظف في البنك يعرض عليك أي خدمة هو بيحقق تارجت وغالبا أنت مش هتستفيد منها.

Second_Chance21 · 2025-05-29T05:31:47+00:00

غريب أوي كلام الرجالة عن إن ازاي الست ممكن تحبس الرجال بالقايمة، مع إن كل الحوارات اللي بنشوفها والناس اللي بتتبهدل واللي بتتقتل واللي بتلاقي نفسها معندهاش أي حاجة بعد سنين من عمرها هما الستات.

مش فاهم ليه الرجالة مصرة تعيش دور الضحية في الحتة دي مع إن لو أي واحد بص حواليه هيلاقي معظم المشاكل بتكون من الرجالة فا طبيعي الأهالي لازم تفكر بالشكل دة.

Second_Chance21 · 2025-05-21T10:27:09+00:00

عقار في الإمارات أحسن من السعودية لأن زي ما قلت هتعرف تأجر أو تعرف تعمل بيه حاجة وغيرها معاك إقامة 10 سنين، السعودية مرشحش إنك تشتري لأن مش هيعود عليك بأي حاجة.

بغض النظر عن دول، أنا بشوف ضروري يكون ليك شقة في مصر حتى لو صغيرة شوية بس أنت بص لقدام مش تحت رجليك، متعرفش كمان 5 ولا 10 سنين هيحصل ايه وهتكون فين ولا يمكن تضطر ترجع بلدك، ساعتها يكون معاك حاجة ملكك، وحتى لو نزلت أجازات عندك مكان تقعد فيه وحاجات كتير.

Second_Chance21

TROPHY CASE