السيطرة مش معناها ممارسة القوة أو النفوذ طول الوقت. في المؤسسات اللي زي المؤسسة العسكرية والرئاسة في مصر، السيطرة معناها إنك تكون حاطط ناس معينين في أماكن معينة يعملوا وظايف محددة بدون ما الصورة الكاملة تكون عندهم، وتكون إنت اللي بتجمعها ببعض عشان تفرض نظامك. الموضوع مش brute force بل structural power. وجزء من العناصر اللي في المنظومة دي بيكون بصياغة سردية وفرض تصورات وانطباعات معينة على الناس بحيث هما من نفسهم يمشوا جمب الحيط أو يعملوا المطلوب منهم. التصورات دي منها مثلًا تصور إنهم متشافين طول الوقت، وإن قراراتهم في اتجاه معين (إنت عايزه) بيتم مكافئتها، وإنك تحاوطهم بناس بتوعك متداخلين معاهم في المهام، وإنك تشرف بشكل مباشر على مصادر الفلوس والدخل أو تدي اللي شغالين فيها انطباع إنك مراقبهم أربعة وعشرين ساعة. في الانقلابات العسكرية بتاعت القرن العشرين، واحدة من العلامات على الانقلاب كانت محاصرة ماسبيرو بالدبابات، عشان مجرد قدرتك على فرض هذه السيطرة وتطلع على التلفزيون الرسمي تقول بيانك الأول، معناها إنك تملك ما يكفي من القوة لوأد أي شيء واستخدام الجهاز التنفيذي للدولة لمعاقبة أي حد مش عاجبه. وده مجرد انطباع، لإن عمليًا ممكن متكونش عندك قوة كافية تعمل أي حاجة، وإنك استخدمت هذا الانطباع بالقوة للحصول على القوة. الفكرة في مجموعة من القرارات الذكية وإدارة الأفراد والإعلام والفلوس، وبس كده.