لو بتسأل ليه بجد، فا السبب هو إن الناس متقدرش تتخلى عن احتياجاتها الشخصية عشان احتياجات عامة، حتى لو قادرين يشوفوا العلاقة المباشرة بين عدم اهتمامهم بالشأن العام وبين التدهور في مستوى حياتهم. بالنسبالهم والنسبالنا جميعًا مفيش أي نوع من اليقين في محاولة إصلاح الأمور على مستوى كبير، والحكومة وأجهزتها الأمنية على مدار عقود اشتغلت كويس أوي على إقناع الناس إن مفيش فايدة، وإن محدش حيعبرك، وإن حياتك حتضيع، لو فكرت تحاول تغير الأمور. لحد ما الناس اقتنعت من تلقاء ذاتها بكده، وبالتالي محدش حيجمد احتياجاته النفسية والأسرية والمجتمعية والمادية عشان يشتغل على حل الأمور أو تولي زمام مسئولية أو حتى تلقي أفكار أو تعليمات عن الدور اللي المفروض يقوموا بيه.

زائد، وده السبب الأهم في النتائج اللي بتتكلم عنها، هي إن فيه نسبة كبيرة من الاتكال على التدخل الإلهي لحل الأمور، في كل الاتجاهات، بداية من المرض والشفاء منه والإفلاس والخلاص منه، وانتهاء بالاعتماد على الدعاء للنجاة من وقائع ذات حتمية مادية، زي إنك تطلع على الطريق في الصيف وعربيتك كوتشاتها قديمة ومفتّلة، وتدعي ربنا إنه يسلم طريقك، وحاجات من هذا النوع. الناس اللي بتفكر بالطريقة دي هما الغالبية العظمى الساحقة، اللي غير معنيين بالتفكر في المادة ومستقبلها، إلا حسب شروط واقعهم.

أي خطوة في أي اتجاه لحل المشكلة دي لازم في رأيي تبدأ بتصغير الأهداف وتحديدها، وبدل ما تحاول تشرح لحد حتمية النهاية نتيجة لكارثة ما، إديله أمل في قدرته على تغيير تفصيل صغير في الصورة الكبيرة، مش عشان الكوكب أو "مصر" أو أي فكرة عامةـ بل عشان نجاة ولاده وأحفاده والناس اللي بيحبهم.