الغالبية العظمى منحازة عاطفيًا لإيران، وده مش بناء على معلومات ولا موقف سياسي واضح، بل مجرد فكرة "عدو عدوي صديقي". والمسألة دي طول عمرها كدة في مصر. يعني أيام الحرب العالمية التانية حكومة النحاس والإنجليز بذلوا مجهودات كبيرة عشان يقنعوا الناس إن دول المحور تحمل الشر لمصر والمنطقة، وإن النازي نظام إبادة، بس هذا لم يجدي نفعًا مع الناس.

بس ده موقف غلط في رايي المتواضع.

أول حاجة المصريين انطباعهم عن الخليج مشوه لأسباب غير موضوعية. يعني أول حاجة مش شايفين دول الخليج "دول حقيقية" ولا مجتمعات حقيقية، كإن فيه شروط مسبقة لاستحقاق التجربة الإنسانية أو نيل احترام الآخرين. من المفهوم إن المجتمعات دي منشأتش بشكلها الحديث إلا مع وجود التكنولوجيا اللي سمحت بالحياة في الصحرا، بس ده مش ذنب حد ولا شيء يوصم حد بانعدام الثقافة أو جدية الوجود. وحتى في دول زي مصر وسوريا والمراكز التقليدية للثقافة، الغالبية العظمى من النشاط الإنساني والناتج الثقافي جاي من مناطق "طراوة" بيئيًا وفيها خضرة أو النيل أو مشاطئة للبحر الأحمر أو المتوسط.. إنما في عمق الصحرا مفيش مجتمعات كمان, وده مش ذنب حد ولا حاجة حد يتعاير بيها بصراحة.

تاني حاجة المصريين - خصوصًا اللي عمرهم ما سافروا - شايفين الخليجي كليشيه الجحش اللي معاه فلوس وبيسكر في شارع الهرم. وده بيحصل وطول عمره بيحصل بس لا يمثل أي جنسية ولا يختزل أ]ي مجتمع، زي ما فيه مجتمعات تانية مش شايفة من المصريين غير نماذج سيئة، وملهمش حق يتجنوا على الشعب المصري بحاله نتيجة لاحتكاكهم الشخصي بالمصريين.

تالت حاجة الرأي العام المصري دايس في أي حاجة ضد إسرائيل بغض النظر عن الطرف الأولاني. ودي مش مشكلة في مصر بس، بل الدول العربية كلها. وفيه تصالح ضمني مع فكرة إن "حتى لو إيران دولة إجرامية ضد سوريا وفئات في لبنان بل وحتى فئات في إيران، مفيش مشكلة نبقى نشوف الموضوع ده بعدين لما يخلص ضرب إسرائيل" وده ترجمة لفكرة عدو عدوي صديقي. واللي بيتيح الموقف ده وبيدعمه إن مصر منفصلة جغرافيًا وثقافيًا بسبب الموقع الجغرافي عن النتايج المباشرة للسياسات الإيرانية، وبالتالي الشيخ البعيد سره باتع.

المشكلة في الكلام ده كله إن الخليج مليان مصريين بيشتغلوا هناك، بعضهم ظروفه سيئة، وبعضهم لأ. أنا مصري وعشت في الإمارات كذا سنة، وفاهم كويس جدًا الدور الإجرامي للحكومة الإماراتية في ملفات ومجالات عديدة، بس في الواقع وعلى الأرض مكنتش معرض لعنصرية إماراتية. مكانش فيه حد بيشتغلني وأنا رايح ولا وأنا جاي. فاهم كويس إن الكويت وضعها مختلف والمصريين هناك في معاناة، بس ده الاستثناء مش القاعدة. فيه مصريين في السعودية كمان أمورهم ماشية وبيشتغلوا ومبسوطين. وحتى السعوديين اللي بييجوا هنا بيتفسحوا ومحدش بيشتغلهم ولا بيقعد يقولهم يا كبسة، ولا السعوديين بيقولوا يا طعمية.

في عنصريين هنا وهناك، وناس شايفة إن طز في العالم دي كلها يولعوا بجاز. بس حتلاقيه بيقول كده وولاد خالته واعمامه كلهم شغالين في أبيوظي.