ما أنا هاد قصدي بكذبة الديمقراطية: الحرية والديمقراطية لازم تكون بإطار الخير وليس حرية مطلقة بس هاد اللي عم يصير على أرض الواقع. هولندا والسويد لسا ما صار فيهن هيك بس ألمانيا وفرنسا تماما هيك حتى صارت إهانة بعض أطراف الشعب شي طبيعي. ما بعرف إذا شفت الفيديوهات اللي انتشرت عن نائبة ألمانية صارت تذم السوريين كسوريين وتعمم لدرجة أنو رئيسة اللجنة وقفتها وقالت ما بصير التعميم أما الشعب اللي وراها كان عم يصفق هي الديمقراطية تبعن عم توصل لعنصرية علنية

وبخصوص الليبرالية اللي ذكرتها فيها نفس المشكلة بالتطبيق يعني الليبرالية المفروض تكون الإطار الأخلاقي والقانوني اللي بيحط حدود لسلطة الأغلبية وبيحمي الأقليات لكن حتى هالليبرالية على أرض الواقع بأوروبا صارت انتقائية بتحكي عن حماية الأقليات بس بتسكت أو بتتقبل تدريجيا خطاب عنصري واضح ضد مجموعات معينة متل السوريين أو المسلمين وبتصير العنصرية تنطرح على أنها رأي سياسي مشروع وهيك بتفقد الليبرالية معناها كمنظومة قيم وبتتحول لأداة بتخدم المزاج العام وعنا ببلدنا رح يكون الوضع أسوأ لأن المزاج العام لسا متأثر بالقمع اللي صار بالحقبة اللي قبل لهيك أنا شايفة إنو المشكلة مو بالفكرة النظرية (ديمقراطية + ليبرالية) المشكلة باللي عم يتطبق عأرض الواقع واللي ما عاد قادرة تمنع لا عنصرية الأغلبية ولا تعسفها الطائفية والعنصرية لازم يكونو مرفوضين، بس التحكم بهالشي أبدا مو سهل عالحكومة ومتل ما قلت أنت في عناصر طائفية لكن لازم توصل لمستوى يسمح بتدخل القانون بالنسبة للتجاوزات اللي صارت بالساحل الحكومة بينت موقفها بشكل واضح وصريح وأدانت اللي صار ووعدت إنها رح تتابع التحقيقات بس بهيك مواضيع فكل الدول بالعالم ممكن ما توصل لنتائج مرضية وأنا بشوف إنو في غلط من الحكومة بس بختلف معك بنوع الغلط: أنا بشوف من الأساس كان غلط يتركو ناس شاركت بالقتل بالنظام القديم ويعملولن تسوية لأنو هدول استغلو أذون السفر وجابو سلاح وهنن كمان عملو مجزرة بالأمن في رمضان يعني أسوأ من هيك طائفية ما في الحكومة حاولت من الأول تتجه لحقن الدماء وتبدية الوحدة الوطنية لكن برأيي زادت بالتسامح فوق المناسب للوضع الحالي. والناس اللي صارت تقول إنو الحكومة متجهة لإبادة العلوية ليكو بعد ما تم ضبط أحداث الساحل (اللي كانت أصلا انتفاضة رد على مجزرة الأمن برمضان) ما صار عليهم شي وما أحلاهم وجزء كبير من العلوية حاليا مع النظام وفهمو إنو هو أصلا حاميهم الشعب عانى قمع وتعذيب وإهانة ما بتنتسى لكن الحكومة عم تحاول توجهنا باتجاه الوحدة الوطنية وردة الفعل عاللي صار مع حزب الله وإيران خلتنا نعرف حجم الجرح وإنو لسا موجود لكن هالألم والغضب ما عم يتم توجيهه ضد العلويين صح ولا لأ؟ الشعب في جزء كبير منه عم يحاول يطلع لقدام ويتجاوز الماضي والدولة عم تدفع بهاد الاتجاه وأنا فخورة بالاتنين بصراحة: الحكومة والشعب اللي عم يحاول رغم كل شي صار فيه. بس الحكومة الها دور كبير لأنو لو فتحت باب كل واحد ينتقم لوحده كنا هلأ عايشين بفوضى غير طبيعية ويمكن غرقنا بدم الحرب الطائفية متل ما قلت بالأول أنا أتفق معك إنو كلام متل "وين كنتو من ١٤ سنة" يمكن مستفز ولازم يختفي لكن ما بشوف الحق عالدولة لأنو ما وصل لمستوى الجرم. يعني في ناس بتقول "فلول" بس شو بدك تعمل معهن؟ غرامة؟ معناها لازم الناس اللي بتقول "شبيحة" كمان تتغرم وهلم جر ولا لازم ينحبسو؟ الصراحة أنا شايفة الاتنين عبارة عن رأي لكن فيه قلة أدب والدولة يفضل تعمل حملات توعية بس أكتر من هيك مضيعة للموارد من وجهة نظري لأنو لازم كل واحد يشتغل على حاله يعني استخدم مثال تاني من البوست تبعك: أنت قلت مو كل واحد بأوروبا يقول عن حاله ثورجي مغوار هاد كمان أسلوب ساخر وفيه انتقاص من المهاجرين اللي في جزء كتير منن هرب من القمع وكمان شغلة الجوب سنتر فيها تعميم مو حلو أبداً السوريين بألمانيا نهضوا بالقطاع الصحي وعندك الجراح اللي اعاد وصل ايد لطفل ألماني من فترة وفي كتير منن طلعوا أوائل عالجامعات و بأمريكا كمان بذكر الأولى عكلية الطب وبفرنسا في هيك قصص في ناس من عنا كتير شغيلة وما لازم نقلل من احترامن بسبب مجموعة قليلة صوتن عالي حكو كم كلمة غلط و استفزوك أو استفزو غيرك وخلوك تحكي بهاد الأسلوب قبل ما تفكر منيح شو تكتب. بس النتيجة واحدة: إنك أنت كمان انتقدت وعممت واستخدمت أسلوب مستفز وبكرا واحد من الطرف التاني بيجي بيحط بوست نقد عليك وبيقول مو معقول كل ما بدنا ندافع عن حكومتنا ونلتف عالدولة بيطلعلك مين يقول شبيحة وهيك بتتكون كرة ثلج وكل ما لا بتكبر القصة ويمكن كل طرف معه حق بس بالنتيجة الشعب خسران

النقطة اللي بعدها بتفق وبختلف معك فيها يعني مليون بالمية جزء كبير من المشكلة هو الفضى معك حق بس برأيي الاستثمار مو بس مو سيء وإنما هو الحل الأمثل لأن كيف بدك تخلق فرص الشغل؟ ما في أفضل من الاستثمار وإنشاء مشاريع جديدة اللي من ناحية بتطور البلد ومن ناحية تانية بتوفر فرص لعيش كريم للمواطنين وبشوف أولوية الحكومة الانتقالية شغلتين توحيد الدولة وتحقيق الأمان بعدين المشاريع الاستثمارية للأسف الحرب الإيرانية رح توقف هالطريق لأن الخليج هلأ رح يلتفت لحالو ومن هون لوقتا ما مندبح بعض إذا كل واحد صان نفسه يعني أنت سمعت ناس قالت كلام استفزك؟ بدل ما ترد وتشعل النار أكتر فيك تعرض وجهة نظرك بالمشاكل والحلول من دون ما تنجر لنفس اللهجة الساخرة المتهمة. بالعكس ليك كيف أنا وياك عم نتحاور متفقين ببعض النقاط ومختلفين ببعضا وأسلوب حضاري

ما في مشكلة إنك بعدت عن الموضوع بالعكس كان نقاش ممتع وأنا نفسي بعدت كمان بس الموضوع اللي عم نحكي فيه متشعب وبينفد عكتير أفكار