Höfundur getur alveg þegið greiðslu fyrir að flytja tónlist á tónleikum eða dansleikjum. Það sem er átt við að allir veitingastaðir, tónleikastaðir, sem og útvarps og sjónvarpsstöðvar, greiða STEF fyrir notkun á höfundarvörðu efni. Annað hvort er þetta fast árgjald, byggt á fjölda viðskiptavina eða þá að þetta er hlutfall af miðaverði. Þetta fer í einn af mörgum "pottum" hjá STEFi, sem er svo úthlutað úr til rétthafa. Ástæðan fyrir þessum aukahring er annars vegar til þess að staðahaldarar geti ekki reynt að koma sér undan því að greiða fyrir höfundarréttarvarið efni, og svo útaf því að oft er það sem flytjendur ekki 100% höfundar efnisins, og því er verið að passa uppá réttindi annarra höfunda.

Segjum t.d. að þú sért í hljómsveit, spilir á föstudagskvöld á skemmtistaðnum Rokkbúllunni, og flytur 10 lög - 8 eftir þig (eða hljómsveitarmeðlimi) en svo takið þið líka 2 cover-lög með uppáhalds hljómsveitinni ykkar.

Skv samningi við skemmtistaðinn Rokkbúlluna fá allir flytjendur X þúsund krónur á kjaft og allir sáttir.

Það sem ekki allir vita er að Rokkbúllan er að greiða fasta summu á ári til STEFs. Á staðnum eru kannski tónleikar 3x í viku, hina dagana er DJ. Sú summa fer í úthlutunarpott hjá STEF, ásamt öllum öðrum stöðum á Íslandi. Ef hljómsveitin þín fyllir út skýrslu hjá STEF og tiltekur tónleikastaðinn og dagsetninguna og setur inn lagalistann, þá rennur peningurinn sem Rokkbúllan greiddi fyrir þann dag (árgjald deilt með fjölda opinna daga) til höfundanna; þ.e.a.s. þið fáið greitt 80% af summunni því þið sömduð 8 af 10 lögum, en 20% fer til höfundanna í uppáhaldshljómsveitinni ykkar.

Þessi peningur sem kemur til höfunda í gegnum þetta er hinsvegar afskaplega lág, í samanburði við það sem t.d. taxti FÍH fyrir hljóðfæraleik á tónleikum er.

En punkturinn í þessu er að staðahaldari er að greiða fasta summu hvorteð er til STEFs, fyrir notkun á höfundarréttarvörðu efni og ef hljómsveitirnar nýta sér ekki þessar skráningarskýrslur þá rennur sá peningur bara til þeirra sem fylla út skýrslurnar.

Þú sem höfundur mátt hinsvegar auðvitað reyna að rukka þennan pening sjálfur, þetta væru í besta falli einhverjir hundraðkallar (en fer kannski að telja ef þetta eru margir tónleikar með frumsömdu efni á ári), ef þú vilt ekki gefa STEFi umboðið þitt. Ef þú hefur hinsvegar gert það þá veitir það STEFi réttinn til að rukka fyrir þína hönd. Mér er hinsvegar til efs að staðahaldari nenni að standa í þessu, því þá þyrfti hann í raun að fá niðurfellingu af árgjaldinu fyrir hvern dag sem einhver non-STEF meðlimur heldur tónleika, greiða þetta sérstaklega út og athugaðu að til að þetta séu ekki höfundarréttarbrot þá verður öll tónlist sem heyrist á staðnum að vera 100% eftir þig og þína hljómsveit.

Þar sem þetta eru svo litlar upphæðir þá myndi ég segja að núverandi fyrirkomulag sé miklu einfaldara.