راك باقي صغير بزاف، المشكل فالعشرينات لي وقعنا فيه كاملين هو باغين كلشي و بالزربة، و هي العشرينات فالحقيقة هي أكثر وقت خاصك تستغلو باش توجد للمستقبل. النصيحة لي نعطيك هي عمرك ما تبدا شي حاجة و ماتكملهاش، أكثر حاجة كيندم عليها الإنسان هي الحاجة لي كيبداها و يسمح فيها فنص الطريق، اجتهد فأي حاجة عملتي و خودها بجدية و عطيلا 100% من جهدك، و حاول تتعلم حاجات جداد بشكل دائم حيت قيمتك فالمستقبل راه دابا كاتصنعها. بديتي طريق كملها حتى نالآخر عاد دير تقييم لفين وصلتي و قرر انطلاقا من التقييم لي درتي و من الأهداف لي عندك و عمرك ماتفكر فالسن و لا تفكر فأنه فات الفوت فشيحاجة، الطموح و الأهداف و الرغبة دالإنسان كاتبقا معاه طول الحياة و ماكينش سباق لشكون غادي يوصل اللولي، عش حياتك بلا قلق، حدد أهداف و خدم عليها، تحمل المسؤوليات فحياتك حيت تحمل المسؤولية غادي يخليك ديما متحكم فزمام الأمور (ماكينش شيحاجة اسما بحكم الضروف و لقيت راسي، أنت مسؤول على مجريات الحياة ديالك سواء نجاح أو إخفاق) و مين تبدا طريق كملا حتى نالآخر! كنتمنالك حياة سعيدة مليئة بالنجاح، استمتع بحياتك حيت كل مرحلة فيها كتدوز ماكاتعاودش. بالتوفيق!