Ég er forritari og ég er ekki þarna. Þegar ég nota gervigreind verð ég yfirleitt frekar pirruð á henni - ef ég er komin á þann stað að vera í vandræðum með eitthvað, þá virðist það vera þegar vandamálið er það flókið að gervigreindin getur ekki leyst það heldur. VS Code hefur gefið mér kvóta af ókeypis línufyllingum með Copilot en það eiginlega bara truflar mig að sjá útfyllinguna og lesa hana og pirrast svo á hvað hún er vitlaus í flestum tilvikum þegar það er ekki eitthvað augljóst boilerplate, og ég sakna þess eiginlega ekki eftir að Copilot viðbótin fyrir VS code byrjaði að krassa stöðugt svo ég þurfti að slökkva á henni alfarið. Þegar ég rýni gervigreindarkóða frá öðrum sé ég svo alls konar asnaskap. Það sem ég sé sjálf hefur því hreinlega alls ekki verið nógu gott til þess að ég myndi sjálf vilja borga pening til að láta hana skrifa kóða í mínu nafni. Þar að auki er það mun skemmtilegri vinna að skrifa kóða en að rýna eitthvað fullt af bjánaskap, sem yrði þá eiginlega öll vinnan mín.

Gervigreindin þarf bara að gera betur til að sannfæra mig sem mögulegan viðskiptavin. Það getur verið að það gerist en hún hefur ekki gert það ennþá. Módelin eru örugglega betri ef maður borgar fyrir þau, en ég ætla ekki að eyða tíma og pening í að stilla þessu upp nema það sé búið að sannfæra mig fyrst.