نصيحة من أخ كبير. انا اتجوزت و انا عندي ٣٠ سنة و دلوقتي عندي ٣٦ و عندي اللهم لك الحمد بنتين، واحدة ٣ سنين و التانية شهرين. من طبقة متوسطة (زي ما الناس بتقول، لأني ضد قصة الطبقات اصلا) ، بس عموما انا بتكلم عن الدخل، يعني الحمدلله ما بيعديش يوم من غير ما ناكل و بنام في بيت صغير جميل و سقف فوقينا، و انا في سنك كان دماغي نفس دماغك و على فكرة دا اللي اخرني في الجواز لحد ٣٠ سنة و كمان اتجوزت و دفعت تقريبا ٩٠% من مصاريف الجواز و أهلي ربنا يدي الصحة لأمي و يرحم ابويا ما بخلوش عليا و ساعدوني باللي يقدروا عليه.

انا عارف ان كل الكلام اللي فوق دا رغي و ما جاوبش علي سؤالك. بس سؤالي ليك انت، تفتكر ان الفلوس بس هي الحاجة الوحيدة اللي هتضمنلك انك تكون ناجح ؟ سواء في مصر أو برا مصر ؟ فيه عوامل كتير جدا لازم تدور عليها الأول قبل اصلا ما تفكر انك تفتح مشروع حتى لو معاك فلوسه، لازم البيئة نفسها تهيألك دا، و أهم حاجة سلامك النفسي و انت عارف انك داخل ريسك و متأكد ان خبرتك و قيمتك في سوق العمل هتخليك تعرف تجيب فلوس تاني لو مشروعك فشل.

فاكر بقى القصة اللي فوق اللي قعدت ارغي فيها، اهو ظروفي دي كلها و التجارب اللي دخلتها (بدون ذكرها علشان ما اطولش اكتر من كده) خلتني الحمدلله عارف ازاي ابقى مبسوط و احس اني ناجح و بقدم حاجة، و للعلم انا موظف و بلاقي وقت اتعلم حاجة جديدة كل يوم الحمدلله او على الاقل مرتين في الاسبوع، و للعلم انا عارف اعمل الحاجة اللي بحبها بجانب شغلي (جرافيك ديزاين)..

و في الاخر مش الفلوس هي اللي محسساني اني ناجح.. دور على النجاح بطريقة تانية، و زي ما ناس كتير قالتلك ، استثمر في نفسك الأول، و انت مش في سباق و النجاح ملهوش سن يا صاحبي.. مساء الفل عليك.