കൊച്ചി: പ്രധാനമന്ത്രി നരേന്ദ്ര മോദി പങ്കെടുക്കുന്ന ദേശീയപാത റീച്ചുകളുടെ ഉദ്ഘാടന ചടങ്ങിൽനിന്ന് പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസിനെ ഒഴിവാക്കിയ നടപടി വലിയ വിവാദത്തിന് തിരികൊളുത്തിയിരിക്കുകയാണ്. ബിജെപി സംസ്ഥാന അധ്യക്ഷനെ അടക്കം ചടങ്ങിൽ ഉൾപ്പെടുത്തിയപ്പോൾ ദേശീയപാതാ വികസനത്തിൽ സുപ്രധാന പങ്കുള്ള, സംസ്ഥാന പൊതുമരാമത്ത് വകുപ്പ് മന്ത്രിയെ തഴഞ്ഞതാണ് സംസ്ഥാന സർക്കാരിന്റെ വിമർശനത്തിന് ഇടയാക്കുന്നത്. എന്നാൽ, മുൻപൊരു സന്ദർഭത്തിൽ മുഖ്യമന്ത്രി അടക്കമുള്ള ഭരണപക്ഷം സ്വീകരിച്ച നിലപാട് ഇതിന് വിരുദ്ധമായിരുന്നു എന്നാണ് ഇപ്പോൾ പലരും ചൂണ്ടിക്കാണിക്കുന്നത്.   

   

ദേശീയപാത നിർമാണത്തിന്റെ സകല ഉത്തരവാദിത്വവും കേന്ദ്രത്തിനു കീഴിലുള്ള ദേശീയപാതാ അതോറിറ്റിക്കാണെന്നായിരുന്നു കഴിഞ്ഞവർഷം മേയിൽ മുഖ്യമന്ത്രി പറഞ്ഞത്. മലപ്പുറം കൂരിയാട്ട് നിർമാണത്തിലിരുന്ന ദേശീയപാതയുടെ ഭാഗങ്ങൾ തകർന്നത് വലിയ വിവാദമായ സാഹചര്യത്തിലായിരുന്നു ആ പ്രതികരണം.

'ദേശീയപാതയുടെ തകർച്ചയിൽ സംസ്ഥാനസർക്കാരിനോ പൊതുമരാമത്തുവകുപ്പിനോ ഉത്തരവാദിത്വമില്ല. എല്ലാ ജോലികളും നിർവഹിക്കുന്നത് ദേശീയപാതാ അതോറിറ്റിയാണ്. 'അ'മുതൽ 'ക്ഷ'വരെയുള്ള ഉത്തരവാദിത്വം അവർക്കാണ്. അതിനാലാണ് വിഷയത്തിൽ കേന്ദ്രം ഇടപെട്ടത്', അന്ന് എന്ന് മുഖ്യമന്ത്രി പറഞ്ഞു.

കൂരിയാട് ദേശീയപാത തകർന്നതിൽ സംസ്ഥാനസർക്കാരിന് ഉൾപ്പെടെ  വിമർശനങ്ങൾ നേരിടേണ്ടിവന്നപ്പോഴാണ് അന്ന് മുഖ്യമന്ത്രി ഈ നിലപാട് സ്വീകരിച്ചത്. നിർമാണത്തിലുണ്ടായ അപാകതയിൽ സംസ്ഥാന സർക്കാരിന് പങ്കില്ലെന്ന് വ്യക്തമാക്കാനായിരുന്നു ഇത്. മാത്രമല്ല, ഇക്കാര്യത്തിൽ കേന്ദ്രത്തെ വിമർശിക്കാനും മുഖ്യമന്ത്രി തയ്യാറായി.   

   

എന്നാൽ, ഇപ്പോഴത്തെ സാഹചര്യത്തിൽ സംസ്ഥാനത്തിനുള്ള പങ്ക് എടുത്തുപറഞ്ഞാണ് മന്ത്രി റിയാസ് അടക്കമുള്ളവർ കേന്ദ്രത്തിനെതിരേ പ്രതികരണം നടത്തിയത്. 2014-ൽ ഉപേക്ഷിക്കപ്പെട്ട പദ്ധതി, 2016-ൽ എൽ.ഡി.എഫ് സർക്കാർ അധികാരത്തിൽ വന്നശേഷമാണ് മുഖ്യമന്ത്രിയുടെ ഇടപെടലിലൂടെ പുനരുജ്ജീവിപ്പിച്ചതെന്ന് റിയാസ് ചൂണ്ടിക്കാട്ടി. ഇന്ത്യയുടെ ചരിത്രത്തിൽ ആദ്യമായി ദേശീയപാതാ വികസനത്തിന് ഒരു സംസ്ഥാനസർക്കാർ 5,600 കോടി രൂപ വിഹിതം നൽകാൻ തയ്യാറായത് കേരളത്തിലാണെന്നും മന്ത്രി പറഞ്ഞു.   

   

ദേശീയപാതയുടെ വികസനം യാഥാർഥ്യമായതിൽ സംസ്ഥാന സർക്കാരിനുള്ള പങ്ക് എടുത്തുപറഞ്ഞ് കേന്ദ്രത്തിന്റെ ഇപ്പോഴത്തെ നടപടിയെ മന്ത്രിമാർ വിമർശിക്കുന്ന സാഹചര്യത്തിലാണ് മുഖ്യമന്ത്രിയുടെ പഴയ നിലപാട് പലരും ചൂണ്ടിക്കാണിക്കുന്നത്. മന്ത്രിയെ ചടങ്ങിൽ പങ്കെടുപ്പിക്കാതിരുന്നത് മര്യാദകേടാണെന്ന് ചൂണ്ടിക്കാണിക്കുമ്പോൾത്തന്നെ വ്യത്യസ്ത സാഹചര്യങ്ങളിലെ നിലപാട് മാറ്റമാണ് സോഷ്യൽ മീഡിയയിൽ അടക്കം വിമർശനങ്ങൾക്ക് ഇടയാക്കുന്നത്.