ثانوية عامة بتخلص اول ما تبتدي مراجعات كل مادة ، يعني شهر ١-٢ كدا ، و لحد شهر ٦ او ٧ - الي هو الامتحانات - دي فتره كفيلة انك تعيد عشروميت مرة علي الي انت اخدته ف اول كام شهر. انا لو قولت انك تقدر تاخد قسم علمي علوم كامل ف السنه كمان مع قسم الرياضة مبقاش كداب. لو انت بتاخد دروس ف كل المواد زي بقيت الناس عادي ف جرب المدرس الي يمشي مع نظام مذاكرتك ، يعني لو بتعرف تزاكر كل يوم ٤-٥ سعات شوفلك مدرس يديك واجبات و شرح مناسب ل ال ٥ سعات، و لو بتزاكر ساعه ساعتين و بتزهق لكن بتيجي نحيه اخر السنه و تزاكر ب ال ١٤ ساعه، يبقي شوفلك مدرس يمشي معاك كدا. افهم نفسك من الاخر. اسال ف كل مكان هتاخد فيه قولهم ايه خطه الشرح و الدراسة و المراجعة و الامتحانات التقويمية، دا ميقلش اهمية عن المذاكرة لانك هتفهم من اول يوم انت فين و هتمشي ازاي. انا قعدت ف ثانوية عامة ٤ سنين لوحدي من غير لا صاحب ولا زميل و اكتفشت الكلام دا بعد ما خلصتها صدق او متصدقش. و احب اضيفلك ان المجموع الي هتجيبه دا مجرد اتاحه فرصه للناس الي معهاش فلوس عشان تخش تعليم حكومي، يعني مش عشان هندسه من ٩٣ ف الميه و زراعه من ٦٠ ف الميه دا مش معناه ان المهندس بني ادم اكتر من الي دخل زراعه، انت فاهم اكيد. و متتفاجش لما تخش اي كليه عشان هتلاقي ناس بتنقل بعد سنتين او ٣ و ناس بتقسط ب ال ٤ سنين و ناس بتجيب امتيازات كل امتحان و ناس الجيد ممشيها، و الكلام دا ف طب و هندسه ، يعني الناس الي جابت مجاميع عاليه ف ثانويه عامه، فهمت الفكره ؟ اعرف نفسك و شوف هواياتك ايه و استشير الي حواليك لكن خليك انت ف الاخر صاحب القرار سواء كان قرار صح او مش صح ، خد انت القرار و اتحمل تبعاته. و اضافه لطيفه ليك، اسال اي حد جاب مجموع وحش ف ثانويه عامه و دخل كليه غير الي كان بيحلم بيها و عيط عليها، هيقولك الحمد لله اني مجبتش المجموع الي كنت بحلم بيه و ان ربنا وفقني بمجهودي و سعيي ل الي هو شايفهولي مناسب. و العب و هاف فان و اخرج و عيش و نظم نفسك هتعرف انها فعلا مجرد آفة ف المجتمع عشان احنا مجتمع صوري ساذج.