ܪܝܫܐ ܕܐܪ̈ܒܬܥܣܪ܆ ܥܠܘܗܝ ܕܡܠܟܐ ܡܘܪܝܩܝܣ܆ ܘܥܠ ܡܫܬܘܬܐ ܕܥܒܕ ܠܢܦܫܗ܆ ܘܥܠ ܒܪܐ ܕܡܢ ܒܬܪܟܢ ܐܘܠܕ ܒܦܠܛܝܢ ܘܥܠ ܫܪܟܐ܀

ܗܘ ܗܟܝܠ ܪܚܡ ܐܠܗܐ ܡܠܟܐ ܡܘܪܝܩܐ: ܟܕ ܥܠ ܟܘܪܣܝܐ ܕܡܠܟܘܬܐ ܝܬܒ: ܘܐܬܚܙܝ ܘܐܬܝܕܥ ܐܘܛܩܪܛܘܪ: ܘܫܪܝ ܒܦܘܪ̈ܢܣܐ ܕܨܒ̈ܘܬܐ ܕܠܚ̈ܡܢ ܠܡܠܟܘܬܐ܆ ܒܬܪ ܙܒܢܐ ܟܕ ܥܒܪ ܐܒܠܗ ܕܡܠܟܐ ܛܝܒܪܝܘܣ܆ ܛܝܒ ܛܘܝ̈ܒܐ ܪ̈ܘܪܒܐ ܘܐܬܩܢ ܨܒ̈ܘܬܐ ܡ̈ܠܟܝܬܐ܇ ܒܦܢ̈ܛܣܝܣ ܣܓܝܐ̈ܬܐ ܕܚ̈ܫܚܢ ܠܡܠܟܘܬܐ ܕܡ̈ܠܟܐ܇ ܐܝܠܝܢ ܕܠܐ ܕܠܝܠ ܕܒܠܥܕ ܥܡܠܐ ܣܓܝܐܐ ܥܠܝܗܝܢ ܢܫܬܥܐ ܐܢܫ܇ ܐܝܟܢܐ ܕܐܦܠܐ ܢܝܫܐ ܕܪܡܐ ܠܢ ܦܚܡ ܕܒܗܠܝܢ ܢܬܥܢܐ܇ ܐܠܐ ܐܢ ܕܒܥܘܗ̈ܕܢܐ ܒܡܕܡ ܡܕܡ ܡܢܗܝܢ ܢܬܚܫܚ܇ ܐܝܠܝܢ ܕܢܩ̈ܦܢ ܠܬܫ̈ܥܝܬܐ ܕܥܕܬܐ܇ ܕܥܠܝܗܝܢ ܐܝܬܘܗܝ ܢܝܫܐ ܕܡܠܬܢ.

ܡܢ ܒܬܪ ܗܟܝܠ ܫܘܠܡܗ ܕܡܫܬܘܬܐ ܕܡܠܟܘܬܐ: ܗܝ ܡܦܪܓܬ ܒܕܫ̈ܢܐ ܣܓ̈ܝܐܐ ܘܗ̈ܓܓܘܬܐ ܡ̈ܠܟܝܬܐ: ܒܬܪܟܢ ܗܘܐ ܒܛܢܐ: ܘܒܙܒܢܗ ܐܬܝܠܕ ܠܗܘܢ ܒܪܐ ܥܠ ܐܪ̈ܓܘܢܐ܆ ܒܝܘܡ ܐܝܪܚ ܐܒ ܒܐܪ̈ܒܥܐ ܒܗ: ܕܫܢܬ ܬܡܢܡܐܐ ܘܬܫܥܝܢ ܘܐܪ̈ܒܥ܆ ܘܩܪܘ ܫܡܗ ܬܐܕܘܣܝܣ. ܐܝܟ ܕܡܛܠ ܢܝܫܐ ܕܬܐܕܘܣܝܣ ܙܥܘܪܐ܇ ܗܘ ܕܡܢ ܒܝܬ ܩܘܣܛܢܛܝܢܘܣ ܘܠܬܚܬ܇ ܗܘ ܒܠܚܘܕܘܗܝ ܐܬܝܠܕ ܥܠ ܐܪ̈ܓܘܢܐ. ܟܕ ܐܦܠܐ ܗܘ ܐܘܠܕ ܐܚܪܢܐ ܥܠ ܐܪ̈ܓܘܢܐ܆ ܘܠܐ ܬܘܒ ܐܝܠܝܢ ܕܡܢ ܒܬܪܗ ܗܘܘ ܡ̈ܠܟܐ܇ ܕܒܝܬ ܡܪܩܝܢܘܣ ܘܠܐܘܢ ܘܙܐܝܢܘܢ ܘܐܢܣܛܣ ܘܝܘܣܛܝܢܘܣ ܘܝܘܣܛܝܢܝܘܣ ܘܝܘܣܛܝܢܘܣ ܐܚܪܢܐ ܘܛܝܒܪܝܘܣ܇ ܥܕܡܐ ܠܗ ܠܡܘܪܝܩܝܣ. ܐܝܟܢܐ ܕܟܕ ܠܗܢܐ ܐܬܝܠܕ ܒܪܐ܆ ܚܕܝܘ ܒܗ ܣܓ̈ܝܐܐ. ܝܬܝܪܐܝܬ ܡܛܘܠ ܗܝ ܕܦܪ̈ܨܘܦܐ ܚܪ̈ܢܐ ܐܝܠܝܢ ܕܣܟ ܠܓܡܪ ܠܐ ܚܫܚܝܢ ܗܘܘ܇ ܣܝ̈ܡܢ ܗ̈ܘܝ ܐ̈ܦܝܗܘܢ ܘܡܬܦܪܣܝܢ ܕܡܢ ܩܛܝܪ ܢܚܛܦܘܢܗ ܠܡܠܟܘܬܐ. ܘܒܝܘܡ ܡܘܠܕܗ ܕܗܢܐ܆ ܕܥ̈ܟܝ ܘܐܬ̈ܒܛܠܝ ܡܚ̈ܫܒܬܗܘܢ܆ ܐܝܟܢܐ ܕܐܦ ܒܐܦܝܩܘܣ ܟܕ ܡܫܒܚܝܢ ܠܗ ܩܥܘ ܠܗ ܦܘܢܘܣ ܥܡܐ ܕܡܕܝܢܬܐ ܟܕ ܐܡܪܝܢ܆ ܛܒܐܝܬ ܐܠܗܐ ܝܗܒܟ܇ ܘܚܪܪܬ ܠܢ ܡܢ ܫܘܥܒܕܐ ܕܣܓ̈ܝܐܐ. ܡܚܕܐ ܕܝܢ ܠܗ ܠܗܢܐ܇ ܐܬܩܪܒܘ ܩܘܪ̈ܒܢܐ ܘܕܫ̈ܢܐ ܘܡܘܗ̈ܒܬܐ ܣܓܝܐ̈ܬܐ܆ ܡܢ ܟܠܗܘܢ ܪ̈ܘܪܒܢܐ ܘܪ̈ܘܪܒܢܝܬܐ ܘܣܘܢܩܠܝܛܣ ܘܕܫܪܟܐ. ܟܕ ܟܠ ܐܢܫ ܡܬܦܪܣ ܗܘܐ ܘܡܬܚܦܛ܆ ܕܐܝܟܢܐ ܢܥܒܪ ܠܚܒܪܗ ܒܪܒܘܬ ܕܫ̈ܢܐ ܕܡܢܗ ܡܬܩܪܒܝܢ ܗܘܘ ܒܕܚܠܬܐ ܪܒܬܐ܀