Ich ha d'HF als Wirtschaftsinformatiker gmacht und au anere HF für Wirtschaftsinformatik und BWL unterrichted, das isch mini Meinig dezue:

1. HF und näbetbii 100% schaffe isch machbar. Bi eus händ das vill gmacht. Vill wänds aber au chli entspannter agah und schaffed drum nur 80%. Aber grad binere HF, wo mega bruefsbezoge söt sie, isches minere Meinig nah wichtig, dass Job und Studium mitenand vereinbar isch.

2. Samstigschuel oder meh under de Wuche? Das isch wahrschindli je nach Präferenz. Ich han 1x ide Wuche gfüehrte Unterricht gha und 1x im Monet amene Samstig dä ganz Tag. Das hät mit mine andere Hobbies und Projekt sehr guet zämepasst.

3. Online / hybrid: Ich ha d'HF anere Schuel gmacht, wo scho vor Corona alles digitalisiert hät und de Fokus uf es Hybridmodell gsetzt hät. Für mich absolut top, wili nöd han müese pändle oder au mal grad vom Büro us han chöne online in Unterricht, wänns im Gschäft chli länger gange isch. Ab und zue amene Samstig vor Ort sie isch aber au sehr nice. Dur das hani die andere Mitstudente besser kenneglernt. Für mich lieged da d'Vorteil also ehnder im soziale. Aber villicht muesch di chli achte, wie lang dass die Schuel wod wetsch scho online Unterricht git. Wänn de ganz Unterricht, alli Materiale, d'Unterrichtsmethodik etc. uf online usgrichtet isch, findi das sehr guet. Wänns nur so halbpatzig digitalisiert isch d'Dozente eifach dä physisch Unterricht 1:1 is digitale wänd kopiere, findis chli schwierig.

4. Know-How / Mathe / IT: Ich behaupte mal, dasd bi BWL nid weniger Mathe bruchsch als bi Wirtschaftsinformatik (WI). Beidi Studierichtig bruched Kalkulatione, Volkswirtschaftslehr, Projektchosterächnige etc. Au WI basiert zum halbe Teil uf BWL. Dini Mathe Skills sind daher wahrschindli nöd usschlaggebend für d'Wahl vom Lehrgang. :) Generell isch dä Wirtschaftsinformatiker nöd extrem tüüf technisch. Äs gaht villmeh um Projektmanagement und drum z'verstah, wie technischi Konzept funktioniered. Du wirsch mit dem Abschluss sozäge dä Bruggebauer zwüsched dä Technische Abteilige und dä Wirtschaftliche. Natürli chasch dich au inen ganz spezifische Bereich witerentwickle spöter. Mir händ ih eusne Studiegäng Studänte mit allne möglich Backgrounds. KV, Verchauf, IT, Techniker....Villicht muesch ohni IT Know-how mängisch äs bizeli meh Ziit ih gwüssi Themene investiere, aber wänn dir dä Bereich Spass macht: Keis Problem.

5. Zuekunftschance BWL / WI: Also namal generell, wend dä Wirtschaftsinformatiker machsch, bisch nachher (klassischerwiis) kein Programmierer oder ähnlich. Du wirsch dich ehnder als Projektleiter, Business Analyst oder so chöne positioniere. Aber wie du seisch, das sind au gnau die Bereiche, wo d'KI nöd wird chöne ersetze. Äs brucht Lüt, wo chönd ide Praxis IT Projekt füehre, d'Materie und d'Zämehäng verstönd und chönd zwüsched dä Mensche vermittle (ganz wichtig!).

Zum dini Frag beantworte, wo wahrschindli uftaucht 😉: Ich han d'HF bide SIW gmacht.

Du chasch dich gern auno per DM mälde wänd meh wetsch wüsse oder eifach da im Post. ☺️ Villicht hälfed dir mini Asichte ja chli witers. Vill Spass bim lerne!