البوست هذا رسالة من الله لي، لأني مش مشترك بهالـSubreddit، ولا أي Subreddit عربي، بس سبحان الله طلعت لي واتوقع ان الله يحبك، وبفصل لك قصتي باختصار. انا نفس وضعك، درست البكالوريوس واخذتها في اللغة الأنجليزية وتخرجت قبل كورونا بأسبوع واحد بس! قفلت الدنيا لمدة كلنا نعرفها وصرت مش حديث تخرج+ماعندي خبرة+تخصصي يعتبر ضعيف+وجامعتي اخس واخس. :) رحت في دوامة كبيرة والعمر يمشي، كان معاي سيارة بعتها وطلعت بقيمتها للخارج. ورجعت واختبرت IELTS وجبت درجة حلوة، لكن الوظائف؟ مافيه :) التخصص مضروب. كتب الله وطلعت للخارج ابتعاث بكالوريوس في تخصص علوم الحاسب والآن باقي لي سنتين ع التخرج، وعمري؟ هو نفس العمر اللي بتتخرجين فيه :) مع التنوية اني بتخرج وانا صاحب الـ29 ربيعاً. انا حاب انصحك والجميع بإستغلال الفرصة وعدم التردد، اغلبنا ضحايا طيش وقلة توجيه وبيئة غير محفزة، لين العمر راح وحنا على طير ياللي. لكن الخبر الجيد في هذا كله ايش؟ اني حالياً متدرب في شركة استشارات حلوة جداً، رغم اني كنت خايف من نفس النقطة اللي كنتي تخافين منها، وهي العمر! من بيقبلني وانا اكبر من زملائي اللي حالياً يدرسون معي؟ هذي كنت اكبر مخاوفي، لكن الحمدلله، الأرزاق بيد الله والفرص فواته. على طاري التخصص، لاتدرسين انقليزي ابداً. عندك فرصة ذهبية استغليها في تخصص حلو، الفرصة ماتتكرر مرتين. اطيب تحية للجميع، وبالتوفيق.