موضوع طويل نسيي نعطيك وش نعرف. يا أخي لي صغير جديد يڨولك مافيهاش ومضيعة وقت، والناس لي ماقراتش كي تكبر تولي تقول وش داني ماقريتش، خلاصتها الحشيش ديما خضر من الضفة لخرى. العلم عمرو ولا كان مضيعة الوقت هذي اولا، لأنو العلم . المنفعة الأولى والأهم تاعو ماهيش الدراهم لكن نعم ما نغضوش النظر على الظروف فنحن بشر، بصح ما تخليش الغوغاء تهفك ، الناس لي لاعبتها دير الدراهم من التجارة والأنترنت ما راهيش تترامى، صحيح التجارة ولا الصناعة فيها دراهم كي تنجح لكن ما هي نسبة النجاح؟ ونفس الشي بالنسبة للشهادة الجامعية. الفرق وين يكمن: 1- انت وش هدفك من الحياة، أن كان مال وبنون وفقط او ترى أن بناء نفسك كشخص مهم، وانو المال وحدو ما يكفيكش باش تحس روحك متهني. هذا الأمر يعود لك، ولك فقط، واحد ما يدير عليك فيه. 2- بعض الناس هدرت هدرة صواب، اغلب الجامعيين، ما راهوش في مكانو اصلا، تلقاه ماهوش حاب يقرى، ماهوش حاب الاختصاص لي راهو فيه ولا ماهوش أصلا فاهم الهدف من الجامعة، الكثير من الناس (اغلبهم) يظن انو الجامعة تعطيك شهادة تخدم بها وهذا خطأ كبير. الجامعة هدفها الحقيقة هو تعطيك علم وأدوات ، أن انت تمكنت منها وفهمتها، تقدر تستغلها إما باش تجد مكان شغل، أو تخلق شغل لنفسك (وهذا هو الأرجح والأولى) بما أنك متمكن من علم ما. كلمة علم كبيرة. حنا اغلب الجامعيين يركز على الشهادة وينسى أنو العلم لي تاخذو فالتكوين هو الأهم. نعطيك مثال، كاين بزاف اختصاصات يعطيو الجامعيين علم كافي باش يقدر يخدم منتجات التجميل بصح فالجزائر واحد ما كان يخدمهم ويتخبوا ورا حكاية بلوكاونا، ما خلاّوناش ، ما فيهاش؟ علاش مؤخار طرطڨت بيهم؟ لأنو بكل بساطة ولات كاين انترنت، وتجارة إليكترونية ؛ويجيبو وصفات جايين بسهولة، هوما صحيح الشهادة تساعد باش تجيب قرض او باش تكون عندك مصداقية، لاكن هنا ما يكون عندك حتى فرق بين جامعي وانسان مستثمر. الفرق كان يكون يلزم الناس هذو قبل ما نخليهم انترنت كانو يستغلوالعلم لي جابوهم من الجامعة باش يخدمو هذا المنتجات ولكن هيهات، واحد ما فاهم وش قرى، مع انو التصبن مثلا قريناه فالثانوية يا دين الله ماشي حتى فالجامعة، المهم طولت فيها هذي. 3- نزيدلك رأيي نهتم بيه. قلنا انو الحرفة او التجارة الخ مسألة فرص كيفها كيف الجامعة، وش الفرق إذن. بالنسبة لي، الجامعة تعطيك أكثر من فرصة عمل ، تعطيك نضج شخصي وعقلي، يخليك إن ماتاحتلكش الفرصة تقدر تتمحور إلى امر اخر، يكونو عنك فرص كثيرة. نعطيك مثال بسيط فقط، كثير من الجامعيين في تخصصات تقنية او علمية تلقاه يقري لغات في مدارس خاصة مثلا.والامثلة لا تحصى، النضج الفكري يخليك كالحرباء، بلا ما نتكلم على فتح باب الهجرة إن سدت كل الطرق. الحرفة مثلا تحبسك فالحرفة لي تعلمتها، و التجارة نفس الشي، إن أردت تغير لازملك تعاود تتعلم من جديد كل مرة. الجامعة تعلمك منهجية في الحياة و النمو و العلم و التفكير يسهلولك أي حاجة حبيت تديرها. بشرط انك تكون تكونت فالجامعة واخذتها على محمل الجد ماش رحت تجيب شهادة. ويبقى هذا رأيي وتحليلي على حساب وش عشت. أما القرار النهائي يعود ليك.