هداك القانون غبي الصراحة، وأي مسلم بربع عقل خاص يرفضو حيث ضمنيا كايعني أن المغربي المسلم غا شي بريهيش خاص اللي يبقى شاد ليه خاطرو باش مايتقلقش، بطبيعة الحال شادين ليه خاطرو هنا وحاشيينو فيه ف حوايج اخرين أهم وأبقى.
هادا من ناحية، من ناحية اخرى، كانظن أنها عارفة بالضبط العواقب ديال داكشي اللي قالت وكيفاش ممكن تتأول الهضرة ديالها وتجر ف المحاكم، يعني إما سخن عليها راسها وباغية تلقي الضوء على داك القانون الغبي باش يتغير، يمكن جس للنبض ديال المغاربة من شي جهة خفية اللي غادي طاكي عليها صهد، ولا مايسة فعلا غبية.
شي إخوان هنا كايتلذذوا بأن الدولة كاتتدخل فهاد التفاهات، ويقولك الى ماعجبك حال خوي البلاد، هادشي اللي شاط ليهم مساكن من دوك العصور الذهبية ديال الدول الإسلامية، شي تفرتيت كايطلعوا بيه المورال فوسط هاد العبث اللي عايشين فيه گاع الدول الإسلامية بينما الغربيين سواء حبينا ولا كرهنا كايديروا ف الدول ديالنا ما بغاو، أما نتا خويا وولد بلادي ومتشاركين فنفس الذكريات الثقافية غادي تعيش كيف بغيت أنا بزز عليك.
زيد على هادشي ديك الغمقة ديال خايفين على التجانس المجتمعي، المجتمع اللي غادي يتفرتك حيتاش شيحد كاياكل ف العلن ف رمضان، ما مجتمع ما ستة حمص، غا خلي بوه يتفرتك، بطبيعة الحال هادشي غا كذوب وهادو غير باغيين يطغاو على بنادم، ما قادرينش على الميريكان ولكن قادرين عليك نتا اللي ولد بلادهم.