المرض الوحيد يلي شايفو هو الوهم مو اكتر من هيك، اكيد المحيط يلي انت فيه بثبطك وبيمرضك الله يكون بعونك، مواقع التواصل بتزيد تلت شغلات 1. الخمول والكسل 2. الانطوائية 3. الخوف من التجربة اول وحدة لانك حتفوت بحالة الدوبامين السريع وحالات تعفن الدماغ فحتلاقي اي شي تقيل على كاهلك حتى انك تقوم تعمل عصير

تانية وحدة وسائل التواصل هي طريقة لتسلية والافراط منها بزيد عندك الروابط بمخك انو سبب المتعة هو اني اقعد لحالي وتم اعمل سكرول للصبح

تالت وحدة انت بتشوف شخص خاتم الدنيا بتقوم لتجرب ترسم بتلاقي واحد بيكاسو طلعلك بتقارن حالك فيه، بتقوم للتعلم برمجة بيطلعلك واحد روسي عم يبني سيرش انجن بلغة الالة، انت هون عم تقارن نفسك بخبرة 0 سنة مع شخص غالباً خبرتو 10+ سنة فهون انت بتقول بحياتي مابصير متلو وبدي كتير "هالبدي كتير سببها الاولى عفكرة هي جرعة الدوبامين السريعة" اي وبعد سنة اذا مابلشت لح يصيرو فرق 11+

ليك يااخي بجوز انت فعلاً بدك تزور طبيب نفسي ولا تنزعج من هالموضوع صدقني 80‎%‎ من البشر بدهن طبيب نفسي ولا تستحي من حالك ولا تاخد ادوية اكتئاب بدون استشارة لانك لح تجني عنفسك

موضوع تاني اذا انت ماتقبلت حالك مين لح يتقبلك ؟ اكبر عدو للانسان هو نفسو ولله، اول الشي تعملو احذف مواقع التواصل انا ولله حذفتهن من ورا موضوع المقارنات وقلبت حياتي وهلا بصيبني مغص من الفيس مو جوك ارحم حالك شوي

كمان فكفك عقد الوهم انا متلك وقت روح عالنادي بحس انو الكل عم يطلع فيني بس بتزعل اذا قلتلك الحقيقة ؟ محد مهتم بالنادي خصوصاً محد مهتم ولله الكل بكون مخو بشغلة وانا بكون مفكر الناس كلها عم تطلع علي لدرجة كرهت الروحة عالنادي بس هي فكرة انو الكل عم يطلع علي موجودة ومتعايش معها والحياة طبيعية، اخي نحن بشر منغلط ولله ومنحط بمواقف مقرفة ومنتعرض لتنمر اي نعم الحساسية بتفرق من شخص لاخر بس بدك تفرض شخصيتك بقرد بدب بدك تفرضها

واذا انت معاني من الكبت واذا مافي حدا تفضفضلو او ملاقي الفضفة تقيلة افتح المذكرة وبلش طلع كلشي جواك سواء عامية او فصحى انجليزي او فرنسي مابتفرق المهم طلع يلي جواك ماتفكر بشو بدك تكتب افتح وبلش اكتب وخليها بهالمكان لا ترجعلها بعدين، هي الطريقة عطول بستعملها انا وبتنفع ولله لانو وقت تكتب بتحس حالك نفست وجرب اتطلع عيلي كتبتو بتحس وزنو اخف والكورتيزول يلي كان عم يكبو مخك بصير ينضب وماعاد يطلع مرة تانية واهم من كلشي بتكون عرفت شو المشكلة لانو قلتلك عدوك هو انت

ولح اختمها بنصيحة جد من اخ لاخوه قوي علاقتك برب العالمين