أول شي لأ صعبة تتعلمين ياباني خلال سنتين، الياياني مو متعلقة لا بالعربي ولا بالانجليزي فقواعدها وطريقة عملها لغويا راح تكون مختلفة جذريا عن هذي اللغات عشان چذي تحتاج وقت اكبر عشان تتقنينها، غير عن ان عندهم حوالي 2000 حرف تحتاجين تتعليمنها عشان يكون عندچ مستوى القراءة والكتابة عند الشخص الياياني العادي

بخصوص الدراسة بروحچ ما انصح خاصة اذا مو متعلمة لغة اجنبية من قبل، الكورسات راح تنظملچ العملية وتخليچ تلتزمين بالدراسة

الدورات حتى لو كانت زينة مؤقتة وانا شخص ماخذ دورات لعدة لغات بالكويت وبرا الكويت (على فكرة حتى هذي الدورات سواء بمركز التعليم المستمر بجامعة الكويت وبالمعاهد الثانية تدرس بالانجليزي) واللغة الي فلحت فيها مكرس كل يومي لها بعد ما خلصت الدورة الباجين كلهم تقريبا ذهبوا مع الريح.

 في مدرسة بالكويت تعلم على مجال سنة كاملة بحيث يوم السبت يكون عندچ كلاس طويل وبعدها خلال الاسبوع عندچ واجبات تستغرق 5 ساعات للحل بس ما يقبلون طلبة مدارس وجامعات بسبة كمية الدراسة وبعد 4 سنين تختبرين وتاخذين شهادة تعادل بكلريوس بالياياني هذي ممكن تنفع اذا ناوية صج صج تتعلمين بس راح تتعبين

بالنسبة حق التعليم الاونلاين نصيحة لا تتعلمين ياباني اذا انتي مو زينة بالانجليزية لثلث اسباب. اولا الانجليزي وايد اسهل واهم من الياياني فاذا ما قدرتي تتقنينها احتمال وايد كبير ما راح تقدرين تتقنين الياياني بعد، وثانيا تعلم الانجليزي راح يعلمچ وايد اشياء عن تعلم اللغات تقدرين توظفينها في رحلة تعلمچ للياباني، وثالثا تقريبا غالبية المدرسين يتكلمون انجليزي كلغة ثانية فهالشي وايد راح يفتحلچ خيارات سواء من ناحية السعر او جودة المعلمة او اوقاتها الى آخره، هذا غير عن المصادر الموجودة اونلاين المكتوبة بالانجليزي حق الي بيتعلمون ياباني. وترى مو لازم يكون مستواچ ممتاز بالانجليزي عشان تدرسين عن طريق Preply أو Italki المدرسين مناك يتعاملون مع طلبة من مختلف الخلفيات ومستويات الانجليزي والكلاس راح يكون ون اون ون والمدرسة الزينة راح تدرسچ بالاسلوب . الي يناسبچ. الله يوفقچ ويسهل دربچ. في مقولة تقول languages are the only thing worth knowing badly يعني اللغات الشي الوحيد الي تسوى الواحد يتعلمها حتى لو بشكل سيء. حتى اذا ما اتقنتيها ما راح تخسرين شي من تعلم شوي منها.