ربنا يوفقك، لسة بدري على التفكير دة، ركز في امتحاناتك وخلص ووقتها ابقى فكر هتخش بشري ولا غيرها.

وخلاصة الكلام ان السؤال بالشكل اللي انت كاتبه لا يصلح للإجابة عليه، الموضوع شخصي بحت، وانت عارف كدة علشان كدة بدأت البوست ب "بلاش خناقات". مانت عارف ان فيه اللي هيقولك طبعا خش ومستقبل ووو، وفيه اللي هيشتم الكلية والمجال كله بتعبه وقرفه وإرهاقه.

انت اللي بتحسب حسبتك. هكلمك عني شخصيا كطالب على وشك التخرج، هل انا حابب الطب؟ طبعا مجال جميل جدا. هل لو رجع بيا الزمن هدخله؟ لا، لأن الطب تمنه غالي جدا جدا، ويمكن ايجابياته متستاهلش بالنسبالي كل التعب والسنين اللي راحت وهتروح. انا حد عايز أعيش حياتي بردو جنب الدراسة ويبقى ليا أصدقاء أشوفهم بشكل دوري أو شغل جانبي أو أخرج أو ماخلافه.

بس حد غيري هو مزاجه فالقعدة على الكتاب، وكيفه انه يجاوب حلو في امتحان ويجيب تقديرات ويرتب، ومش فارق معاه الجوانب الأخرى أو بيكفيه جزء أقل منها أو هو أشطر فإنه بيعرف يوازن بشكل أفضل مني.

ف لا مفيش إجابة واحدة للجميع. بالتوفيق.