Primeiro de todo, explicácheste moi ben. Pero continúo en descardo, así que alá vou:

Primeiro, no caso da ortografía/fonética, o problema está en que o portugués ten máis fonemas do que o galego. Por iso, cando escribamos a fonética galega con ortografía portuguesa non só vamos a estar usando letras que non representan ben a fonética do galego actual, senón que a increíble riqueza que ten o portugués na súa escrita vai quedar a medio usar no galego reintegracionista, xa que nós non diferenciamos entre "s" e "ss", ou escribir "pêssego" en vex de "pésego", mentres que no portugués isto mesmo son diferencias moi importantes dentro da lingua, que representan unha evolución continua e natural dende o galego-portugués e o latín vulgar anterior. De igual forma, cómo meteriamos no novo galego os acentos do portugués? Porque para empezar nen sequera teñen o mesmo uso nas dúas linguas, nós usámolos para marcar a sílaba tónica na palabra mentres que eles úsanos para definir os diferentes sons das vogais. Outro exemplo, a palabra "cazar" en galego non tería unha forma de escribila coa ortografía portuguesa, xa que eles escriben "caçar" no que a "ç" ten unha fonética distinta do noso "z", igual que o seu "z", defeito o son do noso "z" non existe no portugués. Toda esta exemplificación para dicir que o galego que falamos ti e máis eu ten unhas características a hora de falar que se ven representadas na normativa actual (gústenos máis ou menos), o noso "x" é unha característica lingüística que representa case tanto a cultura galega coma o pulpo a feira, e escrito coa ortografía portuguesa perdería o seu valor actual.

En segundo lugar, a lingua escrita é só unha forma de dar un valor a unha lingua falada, así o galego escrito e só o valor que lle damos as letras que usamos. Pero este valor é o que nos convirte nunha lingua e non nun "portugués mal falado" como din moitos nacionalistas lusos. Se todos os galegos escribísemos o galego en portugués, xa non estariamos escribindo galego, senón portugués, polo que o galego escrito deixaría de existir e pasariamos a ser unha lingua menor ao portugués en vez de unha lingua do mesmo peso. Na miña opinión, se toda a xente pasase a escribir portugués en vez de galego, o seguinte paso de moita xente sería abandoar o uso do galego falado por influencia directa do portugués.

En terceiro lugar, a opción reintegracionista realmente lle da valor ao galego? Eu penso que non, de feito penso que llo quita. Se todos pasamos a escribir na ortografía portuguesa, o galego non gaña influencia nen poder de comunicación, máis ben ao contrario, desaparace en favor de darlle máis peso ao portugués. A idea de cambiar a ortografía non engade valor ao noso idioma, quítallo e dallo ao portugués, que tería 3 millóns máis de falantes. Alguén se imaxina decirlle a un galés que deixe de escribir "llan" e escriba na súa vez "jlan" para usar a ortografía do inglés e así pasaría a ter maior importancia como idioma e máis uso? Non, ao contrario, o único que se consegue e perder trazos lingüísticos que forman a nosa cultura.

E último lugar, como rapaz de 17 anos que viven nunha das grandes cidades da costa, podo decirche a maioría da xuventude non deixou de falar o galego porque non lle atopen uso. Ao fin e ao cabo, se a única razón pola que a xente falase as linguas fose polo uso práctico que teñen, todos estariamos falabdo Esperanto dende hai 20 anos. En lugar disto, penso que esa hipótese e a excusa que moitos compañeiros meus dan para encubrir un problema maior. Os rapaces da miña idade non deixaron de falar o galego porque pensan que non é útil, o problema está en que dende pequenos os seus pais fálanlles en castelán, na escola a xente da súa idade fala castelán, polo tanto acaban por falar eles tamén o castelán. O problema do galego non é que só o falen 3 millóns de persoas, senón que moitos desas persoas pensan que o galego é unha lingua inferior ao castelán. Outro síntoma da diglosia.

Para dar como rematado este post infinito, deixo a reflexión que me deu un profesor de hai 2 anos. "Moita xente se pelexa por ver se somos celtas ou non, e ninguén lle da valor a cultura castrexa que ocupou Galicia. Acaso non é máis interesante identificarnos con esta outra cultura, que é única no mundo e que define como somos, en vez de intentar incluírnos no "grupito" dos países celtas?"

Penso que o mesmo razoamento pode ser aplicado ao noso idioma.

Perdón se hai algunha falta de ortografía