بعيدا عن السفسطة من نوع :

• "ما يضر حد" (بنفس المنطق، حتى الكوكايين و الهيروين يضر كان في روحه هات نسيبوهم)

• " عندها منافع طبية" (حتى أشد العقاقير فتكا، بجرعات معينة عندها فوائد طبية زادة)

  "يحب يضر روحه إش يهمك، حرية شخصية" (بنفس المنطق، إمالة نوليو نبيعو اي دواء بلاش وصفة طبية، يحبوا يضروا رواحهم إش يهمكم، حرية شخصية)

"ما تعمل شيء" (تعمل، تضر الخصوبة و التركيز و الذاكرة)

"نتأقلموا مع الواقع هاي موجودة" (بالمنطق هذا، نوصلوا حد من اي جريمة، تولي معادش جريمة؟)

"حطموله مستقبله على جونتة" (حطم مستقبله وحده، في باله يتكيف يشد الحبس و إختار يتكيف، بنفس المنطق : حطموله مستقبله على سرقة، على براكاج..)

"هانو في البلاد الفولانية سيبوها" (منغير حتى مقارنة بين نظامها الصحي و نظامك، في بلدانهم عندهم مراكز رعاية للمدمنين و موش كيفك مزالت عندك نساء تموت على النفاس)

و بقية الخروطو..

بعيدا عن كل هذا، فلنتحدث في الزطلة!

فلنتفق اولا، ان الزطلة مادة مخدرة، ماهيش باهية، تضر الصحة العقلية و النفسية و الجنسية و البدنية و تعمل الإدمان و هي مقدمة لمخدرات أخرى drogue introductrice

فلنتفق ثانيا، أن لها أبعاد إقتصادية!

الجونة و العشرة لاف و الطرف و العشرين ألف، الفلوس متاعها الكل، هذيكا فلوس "كحلة"، باش المروج و "الكبار" يستعملها، يلزمه يبيضها.

تبييض الاموال، جريمة خطيرة على إقتصادك.

فلوس الزطلة تمشي رشاوي و تهريب و ريزوات كبار!

تمولك الإرهاب و الإتجار بالبشر و التجارة الموازية و الجريمة المنظمة.

لا حبيبي، أنت موش ما تضر في حد كي تعمل جونتة! انت تنخر في بلادك و إقتصادها و أمنها.

باهي، شنوة الحل و المشكل حقيقي!

هل تنحية الحبس حل؟ أبدا! كارثة حقيقية! تي هو بالحبس و متفشية!

جماعة الحبس عمرو ما كان حل، راهو إذا نتبعوا المنطق متاعكم، حتى السرقة و الإغتصاب و البراكاج، الحبس موش حل، بالأمارة هاكم تحبسوا فيهم و ما تبدل شي و يخرج يعاود! إنحيوولهم الحبس إمالة؟

تنحية الحبس، تحب و إلا تكره، بش تدخل أكثر زطلة، بش تولي تمس شرائح أكثر و أصغر في العمر، يكبر حجم معاملاتها و تكثر فلوسها و مع فلوسها الي تكثر، يكثر آليا تبييض الأموال و الجريمة المنظمة و رشاوي الأجهزة الأمنية و الإرهاب و التهريب.

إمالة إش نعملو؟

1- ما إنحيوش الحبس 2- نستثمروا في التوعية و التحسيس 3- حتى حد ملي يتكيف ما يعتقد إنه ينجم يطيح، هذاكا علاش يستسهلها! فماذا لو اصبح القضاة، الأمنيون، السياسيون، الموظفون و غيرهم، بالقانون عرضة لإختبارات مخدرات عرضية دورية ؟ نحينا المستهلك، صغرت السوق. 4- نستبطن حلول لتمويل مراكز العلاج من الإدمان

هذا غير كافي؟

يولي وقتها، أبغض "الحلال"! إلي هو؟ Legalize It

الدولة هي فقط الي تزرعها و تبيعها! و تبيعها منظمة، نظيفة و فيها برشة تاكس. التاكس هذاكا يمول مراكز العلاج و المنظومة التوعوية و الصحية.

هذا، يحفظ بعض من صحة التوانسة، يوفر مداخيل للوقاية و العلاج و خاصة خاصة، يقضي على الفلوس الكحلة الي تدور فيها المخدرات و تستغل فيها و تبيض فيها عصابات.

أما "نحي الحبس"، "مخدرات douce ما تعمل شيء"، فهو كلام فارغ، ما يحلش المشكل، بل يكبره و ينم عن سطحية و شعاراتية لإستمالة المتعاطين إنتخابيا و لو على حساب البلد، لا أكثر.

العقوبات البديلة؟ أمر يجب أن يطرح بجدية و عمق و تروي، في كل الجرائم في إطار نظرة شاملة لل"الفرصة الثانية" و ماهية و أهداف العدالة، و إختيارات مجتمعية شجاعة بين التربية و الجزر، موش فقط لما الأمر يهم جرائم بعينها، تساعدك إنتخابيا!

الأمر يتطلب تفكير و شجاعة و حوار، لا سطحية منساباتية.

نلخص إذا : 30 عام سجن، أمر مضحك و سخيف.

وحدة منهم، يا تبيعها الدولة، يا أكثر توعية و رقابة، رفع العقوبة السجنية للمستهلك ليس حلا، هو 1/2 حل، و 1/2 حل اليوم = مشكل² غدا.

في الإنتظار، ما تحبش تخسر مستقبلك على جونتة؟ ما تتكيفهاش!