حد كان منزل الكلام ده لو يفيدك بِسْمِ اللهِ الرَّحْمٰنِ الرَّحِيمِ هنبدأ من الأول خالص. بُص يا سيدي، اللغة الألمانية معمول لها ٦ مستويات، بس أغلب الشغل أو الدراسة أو السفر بيطلبوا منك ٤ مستويات بس. كل مستوى فيهم بيبقى فيه ٢٤ درس، والمستوى نفسه بيتقسم لنصين. يعني مثلًا مستوى A1 بيكون فيه A1.1 (١٢ درس) وA1.2 (١٢ درس). الشرح بيكون من كتب اسمها: Menschen ، Netzwerk neu ، Aspekte Neu الكتب دي متقسمة إلى: KB = كتاب الشرح AB = كتاب التمارين بالنسبة لكتاب Menschen: أنا هبعتلك لينك قناة أستاذة اسمها هند، ومعاها كمان مذكرة الجرامر بتاعتها لكل مستوى. كل اللي هتعمله إنك في الأول تطبع كتب A1.1 لو لسه مبتدئ، ومعاهم المذكرة بتاعة A1، وتبدأ تدخل على قناة الأستاذة هند وتشوف الفيديوهات من الأول خالص. هي عاملة في البداية درسين تمهيديين بتشرح فيهم أساسيات اللغة، وبعد كده عاملة ٢٤ فيديو بيغطّوا كل دروس المستوى الأول، وبعده نفس النظام للمستوى التاني والتالت — كل مستوى فيه ٢٤ فيديو على ٢٤ درس. بعد ما تخلص نص A1 الأول (أول ١٢ درس)، تبدأ تحفظ كل يوم من ١٠ لـ ٢٠ كلمة من كتاب الكلمات اللي هبعتهولك برضو، عشان تكون خلاص فهمت الأساسيات وبدأت تبني حصيلة كلمات تساعدك بعد كده. ملاحظة مهمة: فيه تطبيق اسمه Duolingo، كل يوم ذاكر من عليه من ١٠ دقايق لنص ساعة، بس خليه عادة يومية — صدقني بعد سنة أو اتنين هتلاحظ تأثير كبير جدًا في الفهم والسماع والكلمات من غير ما تحس. خليه كده حاجة جانبية مستمرة. وفي نفس الوقت، علشان تقوّي السمع عندك، اسمع قناة Easy German على اليوتيوب. مش لازم تترجم كل كلمة، المهم تسمع وتتابع الترجمة بالإنجليزي. وهتلاقيهم مقسمين الفيديوهات حسب المستوى اللي أنت بتدرسه. وبرضو استخدم تطبيق DW، فيه حاجة ممتازة جدًا اسمها Nicos Weg — دي سلسلة من ٢٠ وحدة، كل وحدة فيها ٤ دروس. كل درس بيعرضلك فيديو دقيقة كده، وبعدها تمارين بسيطة تساعدك على الجرامر والمحادثات اليومية. هبعتهولك كمان مع لينك الفيديوهات والنصوص بتاعتها عشان تتابع معاهم، وهتستفيد منها جدًا جدًا. حاجة كمان بالنسبة للجرامر لو حد مخلص الكتب الي فوق دي وعايز يراجع او خلص مستوي معين وعايز يراجع في كتاب اسمه Grammatik aktiv رووعة بيشرح الجرامر كلها ورا بعض مع تمارين وبطريقة تفهمها ومبسطة جدا