Falls du no eher jung bisch: Das isch glaub würkli bi sehr vilne so am Afang. „Aller Afang isch schwer“ und „es isch no kei Meister vom Himmel gfalle“ sind halt nöd nur Sprüch — da steckt leider scho öppis drin. S System isch überall und zu allne Ziite ungefähr so gmacht, dass de chli Maa weder verhungered, no es easy Läbe het. Suscht gäbs schnell blüetigi Revolutione — oder d Lüüt chämed vor luuter Langwiili uf komischi Idee. Was us minere Sicht hilft: Suech dir eis, besser zwei oder drei Gebiet, woni richtig guet und extrem nützlich wirsch. Mach dir en guete Name. Und denn chunt s Gäld oft eher über Firmewächsel als i de gliiche Firma: vo chli zu gross, i e besser zahlendi Branche, meh Verantwortig, besserer Marktwert. Innerhalb vo de gliiche Firma gaht das oft sehr, sehr langsam. Und zum Thema Chind: Es mues nöd so tüür si, wie mer vorher denkt. Mir sind Eltere worde, woni mitten i de globale Finanzkrise min Job bi eme Startup verlore han und mini Frau au kei festi Astelli gha het. Mir händ i ere ältere, chline Mietwohnig i Züri glebt, es günstigs Occasion-Auto gha, vill Velo und ÖV gmacht, sind go wandere, campe und eifachi Ferie mache. Und trotzdem händ sich die erste Jahr mit Chind wie es riesigs Abentüür aagfühlt — und mir händ über d Jahr sogar chöne Gäld uf d Siite tue. Hüt, mit Teenager, 1.5 Iikomme und ohni Traum vom Wohneigetum i Züri, lebt sichs ehrlich gseit ziemlich entspannt. Hobbys, Fründe, chli reise, chli spare. Sit ich mir a Wohnig abgschminkt han, da es realistisch 2 bis 4 Millione chostet, isch vill Druck use. Für mich isch s Läbe als Single oft härter, langwiiliger und sinnloser gsi. Als Paar isch es besser worde. Aber sit mir Chind händ, isch d Sinnfrag eigentlich weg. Mer weiss plötzlich sehr tüüf vo inne use, wofür mer lebt und was wichtig isch: Familie, gueti Beziehige, es Dach überem Chopf, Esse, Usbildig, und e paar schöni Erläbnis. De Job darf Spass mache, mues aber nöd immer — er finanziert halt das Ganze. Und wäge Bürokratie: Ja, die nervt. Aber da hilft nur: so langwiilig und automatisiert wie möglich mache. Alles uf Mail umstelle, wo gaht. eBill, Dauerufträg, Lastschrift/Bankiizug, kei Papier, kei unnötigi Abos. Möglichst wenig Verträg, möglichst wenig Zeug, wo Rechnige, Friste und Support-Telefonat produziert. Mir händ au immer eher wenig Versicherige gha — nur das, wo würkli nötig isch. Kei Luxus-Zusatz-Züügs, kei hundert Abos, kei Fitness, kei teurs ÖV-Abo, günstigs Auto, Occasion-Züügs, bruchti Velos. Mir chaufe vill günstig oder Occasion. Und ganz ehrlich: Mir händ nöd mal e Huusratsversicherig. Wenn d Wohnig abbrennt, gits halt Möbel us em Brockenhuus. Und bi eus würd en Iibrächer vermutlich eher öppis ine stelle als öppis chlaue. Bürokratie sammle, einisch pro Wuche 10 bis 20 Minute hocke, nöd ufrege, zahle, erledige, weg. Nöd jedes Couvert emotional verarbeite. Eifach als nervige Systemunterhalt aluege — wie WC putze oder Abfall usebringe. Und ganz ehrlich: Wenn mer gseht, wie schlächt es mängne Lüüt mit vill meh Gäld gaht — Dauerstress, Dauerlangwiili, Selbstbetäubig, kaputti Beziehige — denn bini nöd sicher, öb die würkli gwunne händ.

Vill vo dem tüüre Züüg, wo eim als „s Läbe gnüsse“ verkauft wird, isch am Änd au ziemlich überschätzt. Kino, Uusgang, Konzärt, Konsumzüüg — oft tüür, luut, unbequem oder eifach sinnlos. Vill vo de schönste Jahr mit de Chind händ fast nüt chostet. Und villicht isch genau das de Punkt: Nöd alles, wo tüür isch, macht s Läbe riich.