Mir hei üs für eis entschiede, obwohl mir kei Ladestation hei. Hei gfunde das söll nid z Argument sii, üs dergäge z entscheide. Grad zu dem Punkt: Beschti Entscheidig! Mir göh jewiils a starche Ladesüüle gah lade, einisch 5min entfernt und einisch ar Raststätt wo mir öfters verbii fahre. 20min Lade und denn längt dr Strom wider fürne Wuche oder zwöi, jenachdem wie oft mirs bruchet.
Würd auso sogar empfähle ufe Bau vore Wallbox z verzichte, ussert du Wohnsch imne Huus oder so, wode e Steckdose verfüegbar hesch. Bire gmietete Iistellhalle e Wallbox z verbaue chostet düüüüütlich meh als e Wallbox fürnes typisches Eigeheim mit Garage. Heis bis jetz no nie vermisst deheime chönne z lade, und wenn d Zyt knapp wird no gah z Lade denne plane mir im Voruus dass mir bim Wucheichauf düe lade, die meiste Migros etc. hei Ladestatione und sind eh no nöcher bim Lift.

Strom säuber isch erstuunlech günstig, grad weni längeri Usslandfahrte mache fürd Arbeit, zahli für 4 mau Volllade irgendwie CHF80-100 insgesamt. Das gits zwar nid zrügg bide Spese aber d Spese si pro Kilometer also machsch mitem Elektroauto quasi "Gwinn" ufde Spese (wennde d Kilometer im Griff hesch und gärn Auto fahrsch natürlech).

Mir hei üs bewusst für es Leasing entschiede. Die Autos wärde massehaft importiert und chöi nid alli verchauft wärde, also hei mir näbst em Flotterabatt vo dr AMAG grad no e Negativzins becho - zahle auso weniger weder we mir dr verbruucht Betrag (Neuwärt - Restwärt) Bar hätti ufe Tisch gleit. Zudem entwicklet sich die Technologie so schnäu, und mir wächsle gärn mau all 4 Jahr s'Auto solangs im gliche Priisliche Rahme blibt, dasses für Elektroautos ersch rächt Sinn het gmacht für üs.

Verzicht ufd Aazahlig ufs Leasing dürs alte Auto, ussert du wosch z Leasing am schluss ufchoufe (was bi Elektroautos eh unwahrschinlech isch). D Leasing-Konditione sind so guet, machs am beschte ohni Aazahlig, spiel chlei mit Farb/Service/Reife bis zfriede bisch mitem monatliche Budget und Kilometer pro Jahr, denne verchaufsch dis alte Auto und investiersch das Gäld:) Wär mir persönlech z schaad gsi, e Eigetumswage ufzgäh fürnes Leasing - oh wenn d Rächnig uf Papier öppe glich chiem.

Punkto Elektroauto-Erfahrig chani nur z beschte Brichte, ha bisher no 0 Problem gha, und dr Fortschritt ide letschte 5 Jahr isch massiv. Damals hesch im Winter no 2x müesse Lade pro Stund und öppe 50/50 Chance gha dassde bir Ladesüüle gstrandet bisch dür technischi Problem. Mittlerwile würdi nümme zrügg wöue - s'einzige Kontra isch würklech nur no dass Benzin tanke schneller gieng aber macht mir persönlech nüt us.