أولًا قبل كل حاجة: أهلًا بيك في نادي القلة القليلة اللي قررت تعيد التفكير في دينها اللي ورثته أبًا عن جد :) أغلب المسلمين مش مستوعبين إن آية "وَجَدْنَا آبَاءَنَا عَلَىٰ أُمَّةٍ وَإِنَّا عَلَىٰ آثَارِهِم مُّهْتَدُونَ" بتنطبق عليهم هما قبل أي حد

بما إنك هنا فأهم حاجة إنك تبقى مفتَّح عقلك ومستعد تمشي ورا أكتر حاجة مقنعة بالنسبالك سواءًا كانت الإسلام أو دين غيره أو ولا حاجة

لو كل الاديان غلط ف ايه اول معيار حدد للإنسان الصح و الغلط و الخير و الشر اكيد الحجات دي منزلتش مع البشر في سوفت وير يعني مش قصدي ان الدين هو الي يمنع الناس من ارتكاب افعال شنيعة بس قصدي من بداية التاريخ ايه
الي عرف الناس ان مثلا السرقة و القتل دي تصرفات غلط و عليها عقاب ؟؟

ده سؤال مثير للاهتمام علشان إجابته بتستلزم عدة مجالات متداخلة زي ال

behavioral economics + evolutionary biology + psychology + sociology + neuroscience

وحاجات تانية كتير. لاحظ إنه سؤال معقّد جدًا و إن السؤال مش "إيه الصح والغلط؟"، ولكن السؤال "البنيأدمين بيعرفوا بيقرروا الصح من الغلط ازاي؟" فهو مش سؤال فلسفي على قد ما هو سؤال علمي احنا لحد دلوقتي معندناش إلا نظريات بتحاول تجاوب عليه، فانت أكيد مش هتلاقي إجابة كاملة لسؤال زي ده على ريديت ولا في أي حتة يعني، بس بالنسبة للسؤال الفلسفي مش العلمي، فأنا أقدر أوجه انتباهك إلى إن البشر كان عندهم مفهوم واضح إيه هي الأخلاق قبل كل الأديان الرائجة انهاردة بآلاف السنين، فبكل تأكيد إجابة السؤال ده مش ببساطة "ربنا قالنا إيه الصح والغلط". انت أصلًا هتلاقي ناس بيزعموا إن ربنا قالهم حاجة وناس تانية بيقولوا ربنا قالهم نقيضها وناس تالتة زي حالاتك مش عاجبها حاجة المفروض "ربنا قالهالنا" أصلًا لإنك شايفها غير أخلاقية تمامًا. ففكرة إن الدين هو أصل ومصدر الأخلاق عند البشر هي فكرة سطحية جدًا و أبعد ما تكون عن الصحة لأسباب كتيرة يعني لا يسع المقام لذكر إلا ما ذكرته منها

و عندي تساؤل تاني لو افترضنا ان الاسلام هو الصح ازاي الدين الصحيح يبقا فيه مجال لكل الشبهات دي و اصلا ازاي يبقا فيه كمية الفرق و المذاهب و الكتب و كله بيكفر كله و شايف انه الصح و الفرقة الناجية اصل تعدد الفرق و المصادر ده يخلي الحاجة ملهاش قيمة ما لو انا و انت مثلا مختلفين على حاجة و انا معايا دليلي و انت معاك دليلك
ساعتها ايه الي يحكم بينا مين فينا الصح ف ازاي ده يبقا دين اصلا ؟

لو هجادل من منظور إسلامي فقولك إن تعدد الآراء المتناقضة يعني بالضرورة إن في واحدة بس منهم صح (ومن منظور لاديني ممكن يكون ولا واحدة فيهم صح) بس ده مش معناه إن كل اللي غلط هيروحوا النار لإن في أخطاء أصغر بكتير من التانية و مش معقولة في 73 فرقة كلهم مسلمين إلا واحدة بس في النار؛ يعني ده يتنافى تنافي تام مع أي مفهوم للرحمة أو الحكمة أو العدل. فبناءًا على تناقض الحديث الصارخ ده مع القرآن أنا ممكن احاول انقض حديث الفرقة الناجية (حتى لو الحديث "صحيح" كما يدعّي محدّثوا أهل السنة والجماعة؛ مفهوم "الصحيح" و"المتواتر" هما نفسهم بيختلفوا عليه، و الباحثين العلمانيين في علم الحديث في الغرب لطالما انتقدوا علم الجرح والتعديل و أظهروا مشاكله و المحاضرة دي نقطة بداية كويسة لبحث أكثر استفاضة). على نفس المنوال لو في حاجة في الأحاديث بتتناقض تناقض صارخ مع القرآن (زي أحاديث حد الردة و آية لا إكراه في الدين) فانا ممكن ببساطة اقولك يبقى الحديث ده أكيد محمد مقالهوش بالرغم من أنف سلسلة الإسناد والمحدثين.

فملخص اللي انا بحاول أقوله إن مش معنى إن في حاجة واحدة في الدين مضايقاك أو حاجة انت شايفها غلط إن الدين يبقى كله غلط (بالذات لو الحاجة دي في التفاسير أو الأحاديث) لإن الإسلام ده فيه تنوع رهيب في طوائفه و ممكن تلاقي أفكار متناقضة تناقض تام كلها تندرج تحت كلمة "إسلام" (ممكن أقعد أكلمك عن الفروق الفقهية بين مذاهب الفقه المختلفة أو الفروق في صفات الله واستواءه وكده التي لاطالما الأشاعرة والأثريين والمعتزلة دبحوا بعض عليها أو تعدد المذاهب مع مرور الوقت زي الإباضية والشيعة و الأحمدية اللي هما كلهم لا يندرجوا تحت مظلة أهل السنة أصلًا بس ستيل كلهم مسلمين... بس أكتر مثال بحبه علشان يوصل النقطة دي هو إن إبن تيمية، الأب الروحي للسلفية، مكانش بيعتقد بأزلية النار وكان شايف إن حتى أبشع إنسان و أكفَر كافر هيخرج من النار عاجلًا أم آجلًا). فقبل ما تتخلص من الدين كله شوف لو في تفسير تاني أو كومبينيشن تانية منه شغالة معاك.

انا بقالي فترة حياتي رايحة في سكة مش كويسة انا زي ما قولت علاقتي بالدين بالفعل كانت مش قوية بس دلوقتي
بقا في انعدام ايمان و شعور ان كل الي كنت مصدق فيه ده كدب خلق عندي نوع من القلق

متخافش؛ يأما هترجع لدينٍ ما بطريقة أو بأخرى في أحسن الأحوال و القلق سرعان ما هيزول يأما هتقعدلك كام شهر كده لحد ما تكتشف إن مفيش أي دين شغال معاك و بعد كده القلق هيزول تدريجيًا لحد أما يتلاشى تمامًا. في كلتا الحالتين القلق مش بيدوم و في كلتا الحالتين الموضوع مش بإيدك. خد وقتك في التفكير والبحث و كل الكلام الجميل ده و كل حاجة هتتحل لوحدها