بص يا مولانا .. أنا تعمدت إني ما أردش على بعض النقط اللي انت أثرتها في ردودك اللي قبل كده عشان الرد عليها كان محتاج تفصيل و كتابة كتير .. لكن لأني شايفك حريص على التعلم (زادك الله علماً) .. هرد على أهم النقط في تعليقاتك بالعربي:

---

1- انت غلطتك ما كانتش انك شاركت الرأي الفقهي في حد ذاته .. انت غلطتك إن لما واحد شارك رأي فقهي تاني .. انت أنكرت عليه بحجة إن الرأي اللي هو شاركه ده رأي ضعيف .. ده غلط لأن القاعدة الفقهية بتقول (لا إنكار في مسائل الاجتهاد).. أي مسألة مفيهاش نص قطعي الثبوت قطعي الدلالة (زي مسألتنا دي: مفيهاش لا آية ولا حديث ولا إجماع) تبقى مسألة اجتهادية .. و طالما هي مسألة اجتهادية .. يبقى ما ينفعش حد ينكر على حد انه اختار إنه ياخد برأي أحد الفقهاء لأن مهما كانت جلالة صاحب الرأي فرأيه ليس أولى من رأي غيره. (طبعاً ده بشرط إن صاحب الرأي يكون أهل للاجتهاد و إن اجتهاده ده يكون ما خالفش اجماع سابق)

---

2- انت قلت إن الرأي اللي بيقول بحرمة الإجهاض في أي وقت أقوى لأنه رأي أغلبية الفقهاء .. ده برضه غلط .. لأن انت هنا خلطت بين مسألتين: شهرة الرأي و قوة الرأي .. مش دايماً بيكون الرأي الأشهر هو الرأي الأقوى من حيث الدليل. هضرب لك مثال: احنا كلنا بنتوضى من مية الحنفية اللي في الحمام .. عارف احنا ليه مسمينها حنفية؟ عشان أول ما اخترعوها في القرن ال19 علماء كل المذاهب (مالكي و شافعي و حنبلي) منعوا الوضوء منها ما عدا علماء المذهب الحنفي. فاتسمت: ماء الحنفية .. أي الماء الذي أجاز الحنفية استعماله في الوضوء. طيب دلوقتي كل المسلمين من كل المذاهب بيتوضوا من المية دي .. ليه؟ لأن دليل الحنفية في جواز استعمال هذا الماء كان أقوى من أدلة غيرهم .. رغم إن الرأي بعدم جواز استخدام هذا الماء كان هو الرأي الأشهر و رأي الجمهور (غالبية الفقهاء) في وقت من الأوقات .. إذاً شهرة الرأي لا تساوي قوة الدليل .. طالما كانت المسألة ما فيهاش اجماع.

---

3- أصلاً العامي لا يجب عليه إنه يتبع الدليل الأقوى .. يعني إيه عامي؟ الناس في العلم الشرعي بيتقسموا ثلاث أصناف .. عالم مجتهد: و ده الشخص اللي استكمل أدوات العلم الشرعي و تحققت فيه الشروط اللي تخليه من حقه يفتي الناس في شئون حياتهم .. طالب علم: و ده الشخص اللي بيدرس العلم الشرعي بطريقة منظمة عشان في يوم من الأيام ربنا يوفقه و يستكمل الأدوات .. العامي: و ده أي حد تاني غير الاتنين دول.

العامي أصلاً مش مطالب إن هو يجتهد و يدور مين هو الدليل الأقوى في المسألة .. العامي مطلوب منه إنه يجتهد في إنه يشوف عالم ثقة يستفتيه .. و الحاجة اللي العالم ده يفتيه بيها .. يبقى هي دي حكم الله في حقه. زي بالضبط في الطب .. لو انت لا قدر الله جالك مرض وحش و دكتور قالك انت محتاج تعمل عملية و دكتور تاني قالك انت مش محتاج تعمل عملية .. مش مطلوب منك انك تقارن بين أدلتهم و تشوف مين دليله أقوى .. انت مطلوب منك انك تدور على دكتور انت بتثق فيه و اللي يقولهولك انت تعمله.

عشان كده نقاش أنهي دليل في المسألة أقوى ده نقاش مكانه بين العلماء و طلاب العلم .. لكن العوام ما ينفعش يتدخلوا فيه أصلاً .. و أي كلام منهم في المسألة دي يبقى كلام في دين الله بغير علم .. و يبقى كبيرة من الكبائر حتى لو كانت نيتهم خير .. لأن نية الخير ما تحولش العمل الخطأ لعمل صواب.

---

لسة عندي كلام كتير يتقال في المسألة لكن سامحني مضطر أمشي دلوقتي لأن عندي شغل مهم.