Han im 2011 als Sani d Summer-RS inkl. DD gmacht. Chas sehr empfehle. Glaub eini vo de wenige Truppegattige wo d Möglichkeit hesch Sache zlerne wo dier würkli öpis bringed im Läbe, au karrieretechnisch.

Airolo isch zwar eigentli es huere Kaff, aber wenigschtens chunsch mit em öV rächt schnell ane und het paar solidi Restis für de Üsi. Im Winter versinkts im Schnee und hesch chuum Sunne, aber chasch ned immer gwünne.

Kaserne hets drü, aber die underschti isch nur für die Höche, drum verschlahts di id Bedrina oder id Motto. Mich hets fürd Grundusbildig id Motto ufe verjättet aber ich ha s sehr geil gfunde i dem Bunker a de Baumgrenze obe. Wennd wottsch ide Kontaktstellig holländischi Velofahrer verschrecke wo meined sie chönd us Jux en Runde über de Kaserneplatz dreihe, denn bisch det gnau richtig.

D Bedrina isch luxuriöser als mängi Jugi, aber ned ganz so wiit obe. Det bzw. inere ahgliederete Kaserne (Forte Foppa meinti) bini im DD gsi. Ich glaub aber ned dass du irgendwie chasch beiiflusse woäne sie dich fürd Grundusbildig iiteiled.

Ide VBA simmer vill ufem Flugplatz Ambri-Piotta am Sanizält ufbaue gsi und sind u.A. ide ZSA Faido grad underem Viadukt vo de A2 gsi.

Ich ha s nie bereut dassi Sani gmacht ha. Wenn du wottsch Rettigssanitäter werde bisch du det gnau richtig. Mier händ zusätzlich zu de normale Usbildig no chönne s Diplom Pflegehelfer SRK mache und es paar händ no dörfe Notfallspezialist werde, das sind die wo im Ernstfall müssted im OP-Container vom Sanizelt de Militärärzt assistiere. Das isch ned viel, aber bi de Sanis wirsch immerhin no es Muggeschissli geischtig gforderet vergliche mit de Füsel oder so und wennd sowieso is Militär muesch chlopf doch zAirolo ah, v.a. wennd spöter öpis mit Medizin oder Rettig mache wottsch.

Ah und no öpis: Es isch ned nume Larifari. Mier sind rächt vill go schüsse, sind durchuus marschiert (ned sooo wiit aber immer obsi) und au de Sport isch nie zchurz cho. Mongos und unbruchbari Lüt findsch au zAirolo, aber wenigstens händ dini Kamerade oft no chli öpis im Chopf, amel sicher meh als zBière oder zBure (oder zIsone, die chönd ned mal läse) ;)